ភេរវករមួយចំនួនបានស្លាប់ និងអ្នកផ្សេងទៀតរងរបួសនៅក្នុងហេតុការណ៍ផ្ទុះគ្រាប់បែករថយន្តនៅភូមិ Mishrifa Remo នៅតំបន់ Ras Al-Ayn ភាគពាយព្យនៃទីក្រុង Hasaka ។
គ្រាប់បែកក្នុងរថយន្តបានផ្ទុះឡើង ហើយនៅក្នុងរថយន្តនោះមានក្រុមទាហានស៊ីឈ្នួលគាំទ្ររបបតួកគី។ ហេតុការណ៍នេះកើតឡើងនៅភូមិ Mishrifa Remo ដែលមានទីតាំងស្ថិតក្នុងតំបន់ Ras al-Ayn ភាគពាយព្យទីក្រុង Hasaka នៃប្រទេសស៊ីរ៉ី។ ករណីនេះបាន បណ្តាលឲ្យភេរវករ (ទាហានស៊ីឈ្នួល) ចំនួន៣នាក់ស្លាប់ និងបណ្តាលឱ្យមនុស្សជាច្រើនអ្នកផ្សេងទៀតរងរបួស។
គួររំលឹកផងដែរថា នៅថ្ងៃព្រហស្បតិ៍ ទី១១ ខែមិថុនា សប្តាហ៍មុន ទើបតែមានករណីផ្ទុះកើតឡើងលើដងផ្លូវពីទីក្រុង al-Harak និងក្រុង al-Soura នៅភាគខាងកើតទីក្រុង Daraa។ ហេតុការណ៍នោះបានបណ្តាលឱ្យមនុស្សចំនួន០៣នាក់រងរបួស និងបង្កឱ្យមានការខូចខាតដល់រថយន្តនៅនឹងកន្លែងកើតហេតុ។
មុនហេតុការណ៍ផ្ទុះនៅលើដងផ្លូវ មានករណីផ្ទុះគ្រឿងផ្ទុះកែច្នៃមួយយ៉ាងពេញទំហឹងនៅក្នុងទីផ្សារដ៏មម៉ាញឹកមួយកន្លែងនៅក្នុងទីក្រុង al-Bab ដែលស្ថិតនៅភាគឥសាននៃទីក្រុង Aleppo នៃប្រទេសស៊ីរ៉ី។ ហេតុការណ៍នោះក៏បានបណ្តាលឲ្យមនុស្សមួយចំនួនរងរបួស និងបង្កឱ្យមានការខូចខាតសម្ភារៈនៅក្នុងផ្សារនោះផងដែរ៕
ប្រែសម្រួល៖ប៉ោក លក្ខិណា
ប្រភពព័ត៌មាន SANA ផ្សាយថ្ងៃទី១៥ ខែមិថុនា ឆ្នាំ២០២០
