យ៉ាងហោចណាស់មានទាហានឥណ្ឌាចំនួន២០នាក់ បានស្លាប់ក្នុងការប៉ះទង្គិចគ្នារវាងទាហានឥណ្ឌាជាមួយកងកម្លាំងយោធាចិននៅជ្រលងភ្នំហ្កាលវ៉ាន ( Galwan Valley) នៅភាគខាងជើងតំបន់កាស្មៀរ។
យោងតាមប្រព័ន្ធផ្សព្វផ្សាយឥណ្ឌាបានរាយការណ៍ថា សមាជិកនៃកងទ័ពរំដោះប្រជាជនចិន (PLA) ចំនួន៤៣នាក់ត្រូវបានសម្លាប់ ឬរងរបួសនៅក្នុងការប៉ះទង្គិចគ្នាដែលបានកើតឡើងនៅយប់ថ្ងៃច័ន្ទ និងថ្ងៃអង្គារ។ ទោះជាយ៉ាងណា ទីក្រុងប៉េកាំងមិនទាន់បានបង្ហាញតួលេខផ្លូវការណាមួយនៅឡើយទេ។
ទាក់ទងទៅនឹងការផ្ទុះអំពើរហឹង្សាសម្លាប់គ្នារវាងកងកម្លាំងយោធានចិន និងទាហានឥណ្ឌា ទីក្រុងប៉េកាំងចោទប្រកាន់ថា ទាហានឥណ្ឌាបានឆ្លងកាត់ព្រំដែន និងវាយប្រហារលើកងកម្លាំងយោធាចិន ក្រោយពីទីក្រុងញូវដែលីបានរាយការណ៍ថា កងទ័ពរបស់ខ្លួនចំនួន៣នាក់ត្រូវយោធាចិនសម្លាប់។
ប្រទេសឥណ្ឌាបានហៅតំបន់ដែលមានវិវាទនេះថាជាតំបន់ Ladakh ភាគខាងកើត រីឯភាគីចិនហៅតំបន់នោះថា Aksai Chin ។ តំបន់នេះធ្លាប់ត្រូវបានរដ្ឋកាស្មៀរអះអាងថា ស្ថិតនៅក្រោមការកាន់កាប់របស់ខ្លួន ដែលបានបញ្ចូលដោយប្រទេសឥណ្ឌាក្រោយពីរដ្ឋការស្មៀរទទួលបានឯករាជ្យក្នុងឆ្នាំ១៩៤៧ហើយវាក៏ជាប្រភពជម្លោះដែលកំពុងបន្តកើតមានជាមួយប្រទេសជិតខាងប៉ាគីស្ថានផងដែរ។
គួរបញ្ជាក់ផងដែរថា តំបន់នោះមានជ្រលងភ្នំយុទ្ធសាស្ត្រជាច្រើន និងផ្លូវហាយវ៉េភ្ជាប់តំបន់ស៊ីនជាំង (Xinjiang) និងទីបេ Tibet ដែលមានជ្រលងភ្នំមួយកាត់តំបន់ទាំងពីរ។ ឥណ្ឌាធ្លាប់បានព្យាយាមប្រឆាំងនឹងការត្រួតត្រារបស់ប្រទេសចិនលើតំបន់នេះក្នុងឆ្នាំ១៩៦២ ប៉ុន្តែសង្គ្រាមរយៈពេលមួយខែបានបញ្ចប់ដោយភាគីចិនទទួលបានជ័យជំនះ។
ប្រែសម្រួល៖ប៉ោក លក្ខិណា
ប្រភពព័ត៌មាន RT ផ្សាយថ្ងៃទី១៦ ខែមិថុនា ឆ្នាំ២០២០
