ប្រទេសជប៉ុនបានដកបំរាមដែលទាក់ទងនឹងជំងឺឆ្លងកូរ៉ូណាវីរុសលើការធ្វើដំណើរក្នុងប្រទេសកាលពីថ្ងៃសុក្រនេះ។ រ៉យទ័របានរាយការណ៍ថាលោកនាយករដ្ឋមន្ត្រី Shinzo Abe បានអំពាវនាវឱ្យប្រជាជនអាចធ្វើដំណើរការកម្សាន្ត ឬការចូលរួមការប្រគំតន្ត្រី និងព្រឹត្តិការណ៍ដទៃទៀតដើម្បីជួយសេដ្ឋកិច្ចឱ្យងើបឡើងវិញពីវិបត្តិសេដ្ឋកិច្ចរាតត្បាត។
ប្រទេសនេះបានចាប់ផ្តើមដកចេញនូវការរឹតបន្តឹងរបស់ខ្លួនកាលពីខែឧសភានៅពេលដែលការឆ្លងវីរុសនេះបានធ្លាក់ចុះ។ ការបន្ធូរបន្ថយចុងក្រោយបានកើតឡើងបន្ទាប់ពីការបញ្ចប់សេចក្តីប្រកាសអាសន្នដែលអនុញ្ញាតឱ្យប្រជាជនវិលត្រឡប់ទៅធ្វើការវិញហើយសម្រាប់បារ និងភោជនីយដ្ឋានក៏បន្តអនុវត្តវិធានការណ៍ឃ្លាតឆ្ងាយពីសង្គមផងដែរ។
លោក Abe បានថ្លែងនៅក្នុងសុន្ទរកថាមួយទៅកាន់ពលរដ្ឋកាលពីល្ងាចថ្ងៃព្រហស្បតិ៍ថា“ ខ្ញុំចង់ឲ្យប្រជាជន ធ្វើដំណើរកម្សាន្ត។ យើងចង់អោយអ្នកខិតខំចូលរួមសកម្មភាពសង្គម និងសេដ្ឋកិច្ចវិញ”។ មនុស្សជាច្រើននៅតែជៀសវាងការនៅជាក្រុម ហើយការធ្វើដំណើរទៅប្រទេសជប៉ុននៅតែត្រូវបានរឹតត្បិតដដែល។
យោងតាមអង្គការទេសចរណ៍ជាតិជប៉ុនបានឱ្យដឹងថាវាមានតែជនបរទេសចំនួន ១៧០០ នាក់ប៉ុណ្ណោះដែលបានមកដល់ប្រទេសជប៉ុនក្នុងខែឧសភាដែលជាចំនួនទាបបំផុតក្នុងរយៈពេលនោះចាប់តាំងពីឆ្នាំ ១៩៦៤ ៕
សម្រួល៖ សុផា
ប្រភព RT ចុះផ្សាយថ្ងៃទី ១៩ ខែមិថុនា ឆ្នាំ ២០២០
