ហេតុការណ៍បាញ់សម្លាប់មួយបានកើតឡើងក្នុងពីធីជប់លៀងនៅទីក្រុង Charlotte នៃរដ្ឋ North Carolina។ អាជ្ញាធរនិយាយថា ហេតុការណ៍នោះបណ្តាលឱ្យមនុស្សចំនួន២នាក់ស្លាប់ និងមនុស្ស១២ នាក់ផ្សេងទៀតរងរបួស។
ក្នុងចំណោមអ្នករងរបួសទាំង ១២នាក់មានមនុស្សចំនួន ៧នាក់បានរងរបួសពីការបាញ់ប្រហារនៅក្នុងពិធីជប់លៀង ខណៈមនុស្សចំនួន ៥នាក់ផ្សេងទៀតត្រូវបានបុកដោយរថយន្ត។ នាយកដ្ឋានប៉ូលិសទីក្រុង Charlotte បាននិយាយនៅក្នុងសេចក្តីថ្លែងការណ៍មួយថា អ្នកបាញ់ប្រហារជាច្រើននាក់បានបាញ់រះជាច្រើនគ្រាប់ទៅលើក្រុមមនុស្ស។
គួរបញ្ជាក់ផងដែរថា បើយោងតាមការចុះផ្សាយរបស់សារព័ត៌មាន CNN បានឱ្យដឹងថាមន្ត្រីប៉ូលិសបានលើកទូរស័ព្ទឆ្លើយតបទៅនឹងការហៅរបស់អ្នកថ្មើរជើង ដែលរងការវាយប្រហារពីឡានបុកនៅម៉ោងប្រហែល ១២និង ៣០នាទីព្រឹក នៅពេលប៉ូលិសបានលឺសម្លេងស្នូរកាំភ្លើង។ នៅពេលពួកគេទៅដល់កន្លែងកើតហេតុ សមត្ថកិច្ចបានរកឃើញស្ត្រីម្នាក់ដែលរងរបួសដោយគ្រាប់កាំភ្លើង ដេកនៅលើផ្លូវ Beatties Ford និងមានជាប់គ្រាប់កាំភ្លើង។ នាងបានស្លាប់នៅនឹងកន្លែងកើតហេតុ។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី២២ ខែមិថុនា ឆ្នាំ២០២០
