ហេតុការណ៍បំផ្ទុះគ្រាប់បែកម៉ូតូមួយកើតឡើងនៅថ្ងៃពុធ ទី២៤ ម្សិលមិញ នៅក្នុងទីក្រុង Afrin។ ហេតុការណ៍នោះសម្លាប់ជនស៊ីវិលចំនួន២នាក់ និងបង្កឱ្យមនុស្សចំនួន៣នាក់ផ្សេងទៀតរងរបួស។
ទីក្រុង Afrin ជាតំបន់ស្ថិតនៅក្រោមការកាន់កាប់របស់កងកម្លាំងតួកគី និងទាហានស៊ីឈ្នួលភេរវកររបស់ពួកគេនៅភាគពាយព្យនៃទីក្រុង Aleppo ក្នុងប្រទេសស៊ីរី។
ប្រភពព័ត៌មាននៅក្នុងតំបន់បានប្រាប់ភ្នាក់ងារសារព័ត៌មានថា គ្រាប់បែកម៉ូតូមួយបានផ្ទុះឡើងនៅលើផ្លូវ al-Mahmudiyah ក្នុងទីក្រុង Afrin។ ប្រភពអះអាងថា ហេតុការណ៍នោះបានសម្លាប់ជនស៊ីវិលចំនួន ២នាក់ និងបង្កឱ្យមនុស្សរងរបួសយ៉ាងហោចណាស់ចំនួន៣នាក់ និងបណ្តាលឱ្យមានការខូចខាតសម្ភារៈ និងផ្ទះនៅក្បែរទីតាំងផ្ទុះនោះផងដែរ។
គួររំលឹកផងដែរថា ថ្មីៗនេះក៏មានហេតុការណ៍ផ្ទុះគ្រាប់មីនមួយបានកើតឡើងនៅក្នុងភូមិ al-Rashideen al-Oula នៅភាគខាងលិចទីក្រុង Aleppo ក្នុងប្រទេសស៊ីរី។ ក្រោយមក មានមនុស្សចំនួន៣នាក់រងរបួសដោយនៅក្នុងនោះមានបុរសម្នាក់ និងកុមារចំនួន២នាក់។ នោះជាលទ្ធផលនៃការផ្ទុះគ្រាប់មីនដែលបន្សល់ទុកដោយក្រុមភេរវករដែលធ្លាប់បោះទីតាំងនៅក្នុងតំបន់នោះ៕
ប្រែសម្រួល៖ ប៉ោក លក្ខិណា
ប្រភពព័ត៌មាន SANA ផ្សាយថ្ងៃទី២៤ ខែមិថុនា ឆ្នាំ២០២០
