ការប៉ះទង្គិចគ្នារវាងទាហាន និងសកម្មជនតាលីបង់ នៅយប់ថ្ងៃពុធ ទី២៤ ឆ្នាំ២០២០ នេះ បណ្តាលឱ្យទាហាន ២នាក់ និងសកម្មជនតាលីបង់ចំនួន ១១នាក់ស្លាប់ និងបង្កឱ្យ សកម្មជនតាលីបង់ចំនួន៤នាក់ និងទាហានចំនួន១នាក់ផ្សេងទៀតរងរបួស។
នៅភាគខាងជើងខេត្ត Baghlan ក្នុងប្រទេសអាហ្វហ្គានីស្ថាន មានទាហានចំនួន២នាក់ និងសមាជិកតាលីបង់ចំនួន៦នាក់ ត្រូវបានសម្លាប់ភ្លាមៗនៅក្នុងការវាយប្រហាររបស់សកម្មជនតាលីបង់ទៅលើជំរុំយោធាជាតិនៅសង្កាត់ Dand-e-Ghori ដែលជាតំបន់មួយស្ថិតនៅជាយក្រុង Pul-e-Khumri នៃប្រទេសអាហ្វហ្គានីស្ថាន។
ក្រៅពីនេះនៅមានទាហានចំនួន១នាក់ និងសកម្មប្រយុទ្ធតាលីបង់ចំនួន៤នាក់ផ្សេងទៀតបានរងរបួសក្នុងអំឡុងពេលយុទ្ធគ្នា ហើយវាជាមូលហេតុដែលបានបង្ខំឲ្យសមាជិករបស់ក្រុមសកម្មប្រយុទ្ធរត់ភៀសខ្លួនទៅភ្នំដែលស្ថិតនៅក្បែរទីនោះ។
ក្រោយមកទៀតក្រសួងការពារជាតិអាហ្វហ្គានីស្ថានបាននិយាយនៅក្នុងសេចក្តីថ្លែងការណ៍មួយថា នៅក្នុងស្រុក Khash Rod ភាគខាងលិចខេត្ត Farah មានក្រុមសកម្មប្រយុទ្ធតាលីបង់ចំនួន៥នាក់ត្រូវបានសម្លាប់បន្ថែមទៀតក្រោយពីកងទ័ពអាហ្វហ្គានីស្ថានបានវាយបកចំពោះការវាយប្រហាររបស់សកម្មប្រយុទ្ធតាលីបង់ទៅលើប៉ុស្តិ៍ត្រួតពិនិត្យសន្តិសុខ។
គួរបញ្ជាក់ផងដែរថា ក្រៅពីបានសម្លាប់សកម្មជនតាលីបង់ចំនួន១១នាក់រួច កងកម្លាំងទ័ពក៏បានរកឃើញ និងដកហូតអាវុធមួយចំនួន និងគ្រាប់កាំភ្លើងក្រោយពីមានការប៉ះទង្គិចគ្នា។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី២៥ ខែមិថុនា ឆ្នាំ២០២០
