ភ្នាក់ងារសារព័ត៌មាន Tasnim បានរាយការណ៍នៅថ្ងៃព្រហស្បតិ៍ម្សិលមិញនេះថា ក្រសួងការបរទេសប្រទេសអ៊ីរ៉ង់បានថ្កោលទោសចំពោះការវាយប្រហារភេរវកម្មមួយនៅព្រំដែនរវាងប្រទេសទួរគី និងប្រទេសអ៊ីរ៉ង់ ដោយគ្រាប់កាំភ្លើងធំបានវាយប្រហារលើទឹកដីអ៊ីរ៉ង់។
យោងតាមប្រភពរបាយការណ៍របស់ប្រព័ន្ធផ្សព្វផ្សាយតួកគីបានឲ្យដឹងថា នៅល្ងាចថ្ងៃទី២៣ ខែមិថុនានេះមានការប៉ះទង្គិចគ្នាដោយអាវុធបានកើតឡើងរវាងក្រុមភេរវករ និងកងកម្លាំងយោធាតួកគីនៅក្បែរព្រំដែនប្រទេសអ៊ីរ៉ង់។
អ្នកនាំពាក្យក្រសួងការបរទេសអ៊ីរ៉ង់ លោក Abbas Mousavi បានសម្តែងការសោកស្តាយចំពោះឧប្បត្តិហេតុនេះ និងបង្ហាញពីការអាណិតអាសូរដល់ជនរងគ្រោះ។ លោកថែមទាំងបានធ្វើការថ្កោលទោសចំពោះសមាជិកភេរវករ ដែលកំពុងធ្វើចលនានៅក្នុងប្រទេសទាំងពីរ និងបានថ្កោលទោសលើសកម្មភាពវាយប្រហាររបស់ពួកគេនៅព្រំដែន និងលើកងកម្លាំងយោធា ដោយការវាយប្រហារនោះបានសម្លាប់កងកម្លាំងយោធាជាច្រើននាក់នៅក្នុងប្រទេសទាំងពីរ។
លោក Mousavi មានប្រសាសន៍ថា លទ្ធផលនៃការប៉ះទង្គិចគ្នានៅថ្ងៃអង្គារ មានគ្រាប់កាំភ្លើងធំមួយចំនួនបានវាយប្រហារលើទឹកដីរបស់ប្រទេសអ៊ីរ៉ង់ ប៉ុន្តែវាមិនបង្កឱ្យមានមនុស្សរងគ្រោះថ្នាក់ឡើយ។
គណបក្សពលករឃឺដខុសច្បាប់ (PKK) បានអះអាងទទួលខុសត្រូវចំពោះការវាយប្រហារទៅលើកម្លាំងសន្តិសុខរបស់ប្រទេសតួកគី និងចំពោះសកម្មភាពបំផ្លិចបំផ្លាញមួយចំនួនលើបំពង់បង្ហូរថាមពលពីប្រទេសអ៊ីរ៉ង់ទៅប្រទេសតួកគី។
គួររំលឹកផងដែរថា គណបក្សពលករឃឺដខុសច្បាប់ត្រូវបានប្រទេសតួកគី សហរដ្ឋអាមេរិក និងសហភាពអ៊ឺរ៉ុបចុះបញ្ជីជាអង្គការភេរវករ។ ក្រុម PKK បានធ្វើសង្គ្រាមរយៈពេល៣០ឆ្នាំមកហើយដើម្បីប្រឆាំងនឹងរដ្ឋាភិបាលប្រទេសតួកគី៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី២៥ ខែមិថុនា ឆ្នាំ២០២០
