មន្ត្រីនៅក្នុងទីក្រុងបាដាដនៃប្រទេសអ៊ីរ៉ាក់បាននិយាយថា កងកម្លាំងសន្តិសុខអ៊ីរ៉ាក់បានធ្វើការវាយឆ្មក់ទៅលើកងជីវពល Kataib Hezbollah នៅទីស្នាក់ការកណ្តាលមួយ និងចាប់បានមេដឹកនាំកងជីវពលចំនួន៣នាក់ ហើយក្រោយមកទៀតបានបញ្ចូនពួកគេទៅឱ្យកងកម្លាំងយោធាសហរដ្ឋអាមេរិក។ កងកម្លាំងជីវពលដែលទទួលបានការគាំទ្រពីប្រទេសអ៊ីរ៉ង់គឺជាបេះដូងនៃជម្លោះរវាងកងកម្លាំងសហរដ្ឋអាមេរិក និងកម្លាំងអ៊ីរ៉ង់នៅដើមឆ្នាំនេះ។
កងកម្លាំងពិសេសមកពីអង្គភាពប្រឆាំងអំពើរភេរវកម្មបានធ្វើប្រតិបត្តិការវាយឆ្មក់នៅព្រឹកព្រលឹមថ្ងៃសុក្រ នៅមូលដ្ឋានភាគខាងត្បូងនៃទីក្រុងបាកដាដ។ ភ្នាក់ងារសារព័ត៌ដកស្រង់សម្តីរបស់មន្ត្រីរដ្ឋាភិបាលអ៊ីរ៉ាក់ថា មេដឹកនាំម្នាក់ក្នុងចំណោមមេដឹកនាំកងជីវពលចំនួន៣នាក់ ដែលត្រូវបានចាប់ឃុំខ្លួននៅក្នុងប្រតិបត្តិការវាយឆ្មក់នោះគឺជនជាតិអ៊ីរ៉ង់។ កងកម្លាំងសន្តិសុខអ៊ីរ៉ាក់និយាយថា មានគ្រាប់រ៉ុក្កែតមួយចំនួនត្រូវបានរឹបអូសយកផងដែរ។
ប្រតិបត្តិការវាយឆ្មក់នេះហាក់បីដូចជាទទួលបានការបញ្ជាពីនាយករដ្ឋមន្ត្រីនៃប្រទេសអ៊ីរ៉ាក់លោក Mustafa Al-Kadhimi ដែលបានចូលកាន់តំណែងនៅខែមុន និងបានប្រឆាំងចំពោះសម្តីរបស់ក្រុមកងជីវពល Kataib Hezbollah និងកងជីវពលដែលមានប្រជាប្រិយភាពផ្សេងទៀត (PMF) ។
កងជីវពល Kataib Hezbollah បានស្ថិតនៅចំកណ្តាលនៃភាពតានតឹងរវាងទីក្រុងវ៉ាស៊ីន តោន និងទីក្រុងតេហេរ៉ង់ជុំវិញវត្តមានរបស់កងកម្លាំងសហរដ្ឋអាមេរិកនៅលើទឹកដីនៃប្រទេសអ៊ីរ៉ាក់។ សហរដ្ឋអាមេរិកបានចោទប្រកាន់ទៅលើកងជីវពល Shia ពីសកម្មភាពធ្វើការវាយប្រហារ ដោយប្រើគ្រាប់រ៉ុក្កែតម្តងហើយម្តងទៀតជាច្រើនលើកប្រឆាំងនឹងមូលដ្ឋានបុគ្គលិករបស់សហរដ្ឋអាមេរិក ហើយសហរដ្ឋអាមេរិកបានទម្លាក់គ្រាប់បែកទៅលើទីតាំងរបស់កងជីវពល Kataib ដើម្បីជាការសងសឹក។
សូមរំលឹកផងដែរថា នៅឆ្នាំមុននេះ ធ្លាប់មានការវាយប្រហារមួយបានកើតឡើងនៅក្នុងខែធ្នូ ឆ្នាំ២០១៩ ដែលបានជម្រុញឱ្យក្រុមសកម្មប្រយុទ្ធឡោមព័ទ្ធស្ថានទូតសហរដ្ឋអាមេរិកនៅក្នុងទីក្រុងបាកដាដ។ដើម្បីជាការឆ្លើយតបទៅនឹងសកម្មភាពនេះប្រធានាធិបតីអាមេរិកលោក Donald Trump បានបញ្ជាឱ្យមានការវាយប្រហារដោយប្រើយន្តបញ្ជាប្រឆាំងនឹងថ្នាក់ដឹកនាំ PMF នៅថ្ងៃទី២ ខែមករា។ ហេតុការណ៍នោះបានសម្លាប់មេបញ្ជាការកងកម្លាំងឆ្មាំបដិវត្តអ៊ីស្លាមអ៊ីរ៉ង់ (IRGC) លោក Qassem Soleimani ។
ដោយមានការខឹងសម្បារចំពោះការបាត់បង់មេដឹកនាំរបស់ខ្លួន ប្រទេសអ៊ីរ៉ង់បានវាយបកទៅសហរដ្ឋអាមេរិក ដោយធ្វើការបាញ់គ្រាប់មីស៊ីលប្រឆាំងនឹងមូលដ្ឋានទ័ពសហរដ្ឋអាមេ រិកជាច្រើននៅលើទឹកដីប្រទេសអ៊ីរ៉ាក់។ ហេតុការណ៍នោះបានបណ្តាលឱ្យមានការខូចខាតដល់សម្ភារៈយ៉ាងច្រើន ប៉ុន្តែមិនបានសម្លាប់ទាហានសហរដ្ឋអាមេរិក ឬទាហានអ៊ីរ៉ាក់នោះទេ។ ក្រោយមក មានពាក្យចច៉ាមអារ៉ាមថា ទីក្រុងវ៉ាស៊ីនតោន និងទីក្រុងបាកដាដបានទទួលដំណឹងពីការព្រមានមុនពេលមានការវាយប្រហាររបស់អ៊ីរ៉ង់។ ចាប់តាំងពីពេលនោះមកភាពតានតឹងរវាងសហរដ្ឋអាមេរិក និងអ៊ីរ៉ង់បានកើតឡើងជាបន្តបន្ទាប់ តែទោះជាយ៉ាងណា ភាពតានតឹងមិនទាន់បានកើនឡើងដល់ចំណុចដែលអាចនាំឱ្យកើតសង្គ្រាមដោយបើកចំហនោះទេ។
យ៉ាងណាមិញ ប្រតិបត្តិការការវាយឆ្មក់នៅថ្ងៃសុក្រអាចជាមូលហេតុនាំឱ្យមានសង្គ្រាមជាថ្មីម្តងទៀតរវាងសហរដ្ឋអាមេរិក និងអ៊ីរ៉ង់។
ប្រែសម្រួល៖ ប៉ោក លក្ខិណា
ប្រភពព័ត៌មាន RT ផ្សាយឡើងវិញនៅថ្ងៃទី២៦ ខែមិថុនា ឆ្នាំ២០២០
