អ្នកនាំពាក្យយោធានិយាយនៅថ្ងៃចន្ទម្សិលមិញនេះថា យោធានីហ្សេរីយ៉ាធ្វើការវាយប្រហារតាមអាកាសនៅភាគឦសាននៃរដ្ឋ Borno សម្លាប់សមាជិកសកម្មប្រយុទ្ធ Boko Haram ជាច្រើននាក់។
អ្នកនាំពាក្យយោធានីហ្សេរីយ៉ា លោក John Enenche មានប្រសាសន៍នៅក្នុងសេចក្តីថ្លែងការណ៍មួយថា ការវាយប្រហារតាមអាកាសធ្វើឡើងក្រោយពីកងកម្លាំងយោធានីហ្សេរីយ៉ាបំពេញបេសកកម្មស៊ើបការណ៍តាមអាកាសលើតំបន់ Warshale ក្នុងរដ្ឋ Borno អស់រយៈពេលជាច្រើនថ្ងៃ។
បេសកកម្មស៊ើបការណ៍ដែលធ្វើដោយយន្ដហោះយោធាចំនួនពីរបានរកឃើញថាតំបន់តាំងទីលំនៅនោះត្រូវបានប្រើប្រាស់ដោយក្រុមភេរវករដើម្បីអនុវត្តការវាយប្រហារភេរវកម្ម។
លោក Enenche បន្ថែមថា ក្នុងអំឡុងពេលនៃការវាយប្រហារតាមអាកាសក៏បណ្តាលឲ្យរចនាសម្ព័ន្ធជាច្រើននៅក្នុងជំរុំរបស់សកម្មប្រយុទ្ធ Boko Haram រងការបំផ្លាញ ហើយសមាជិករបស់ក្រុមភេរវករមួយចំនួនបានរត់គេចខ្លួន។
គួររំលឹកផងដែរថា ចាប់តាំងពីឆ្នាំ២០០៩ មក ក្រុមសកម្មប្រយុទ្ធ Boko Haram បានព្យាយាមបង្កើតរដ្ឋអ៊ីស្លាមនៅភាគខាងឦសាននៃប្រទេសនីហ្សេរីយ៉ា និងបង្កើនការវាយប្រហាររបស់ពួកគេទៅកាន់បណ្តាប្រទេសនានាក្នុងតំបន់ Lake Chad Basin៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី៣០ ខែមិថុនា ឆ្នាំ២០២០
