ក្រសួងមហាផ្ទៃអ៊ូសបេគីស្ថាននិយាយនៅថ្ងៃពុធម្សិលមិញនេះថា អង្គភាពអនុវត្តច្បាប់របស់ប្រទេសអ៊ូសបេគីស្ថានបានឃាត់ខ្លួនមនុស្សចំនួន១១នាក់សង្ស័យជាសមាជិករបស់ក្រុមសកម្មប្រយុទ្ធអ៊ីស្លាមនិយម Katiba al-Tawhid wal-Jihad។
មន្ត្រីប៉ូលិសនិយាយថា ជនសង្ស័យត្រូវបានចាប់ខ្លួននៅថ្ងៃអង្គារ ដើមសប្តាហ៍នេះ ក្រោយពីប៉ូលិស និងកងកម្លាំងសន្តិសុខរបស់រដ្ឋបានធ្វើប្រតិបត្តិការនៅទីតាំងចំនួន៨ក្នុងទីក្រុង Tashkent ដើម្បីស្វែងរកភ័ស្តុតាងនៃសកម្មភាពខុសច្បាប់របស់ភេរវករទាំងនោះ។
យោងតាមប្រភពសេចក្តីថ្លែងការណ៍របស់ប៉ូលិសបាន ឲ្យដឹង ថាអ្នកជាប់ឃុំទាំងនោះបានស្ថិតនៅក្រោមឥទិ្ធពលរបស់ក្រុមសកម្មប្រយុទ្ធដែលកំពុងធ្វើប្រតិបត្តិការនៅអង្គការភេរវកម្មអន្តរជាតិមួយក្នុងប្រទេសស៊ីរី ហើយពួកគេគ្រោងនឹងធ្វើដំណើរទៅកាន់ប្រទេសមជ្ឈឹមបូព៌ា។
គួររំលឹកផងដែរថា នៅខែមុន ស្ថាប័នអនុវត្តច្បាប់នៃប្រទេសអ៊ូសបេគីស្ថានបានចាប់ខ្លួនបុរសចំនួន២៥នាក់ដែលគេជឿថាមានទំនាក់ទំនងជាមួយក្រុមសកម្មប្រយុទ្ធដូចគ្នា។ តុលាការកំពូលរបស់ប្រទេសអ៊ូសបេគីស្ថានបានដាក់ឈ្មោះក្រុម Katiba al-Tawhid wal-Jihad ជាអង្គការភេរវករក្នុងឆ្នាំ២០១៦ ។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១ ខែកក្កដា ឆ្នាំ២០២០
