ជនស៊ីវិលម្នាក់ស្លាប់ដោយសារការផ្ទុះគ្រាប់មីនដែលបន្សល់ទុកដោយក្រុមភេរវករនៅភូមិ Abu Habilat ដែលមានទីតាំងស្ថិតនៅភាគខាងកើតទីក្រុង Salamiya ក្នុងខេត្ត Hama នៃប្រទេសស៊ីរី។
ភ្នាក់ងារសារពត៌មានបញ្ជាក់ថា គ្រាប់មីនដែលដាំដោយអង្គការភេរវករបានផ្ទុះឡើងនៅក្នុងភូមិ Abu Habilat ភាគខាងកើតទីក្រុង Salamiya ក្នុងខេត្ត Hama នៃប្រទេសស៊ីរី។ ហេតុការណ៍នោះបណ្តាលឱ្យជនស៊ីវិលម្នាក់ស្លាប់។
គួរំលឹកផងដែរថា នៅថ្ងៃ២៤ ខែមិថុនាខែមុននេះ បណ្តាញសារពត៌មានបានចុះផ្សាយពីហេតុការណ៍ផ្ទុះគ្រាប់មីនមួយបានកើតឡើងនៅក្នុងភូមិ al-Rashideen al-Oula នៅភាគខាងលិចទីក្រុង Aleppo ក្នុងប្រទេសស៊ីរី។ ក្រោយមក មានមនុស្សចំនួន៣នាក់បានរងរបួសដោយនៅក្នុងនោះមានបុរសម្នាក់ និងកុមារចំនួន ២នាក់។ នោះជាលទ្ធផលនៃការផ្ទុះគ្រាប់មីនបន្សល់ទុកដោយក្រុមភេរវករដែលធ្លាប់បោះទីតាំងនៅក្នុងតំបន់នោះ។
ចំណែកឯកាលពីពាក់កណ្តាលខែមិថុនា បណ្តាញសារព័ត៌មានក៏បានចុះផ្សាយផងដែរថា អាជ្ញាធរបានសហការជាមួយអ្នកស្រុករកឃើញអាវុធ និងគ្រាប់រំសេវមួយចំនួនធំរួមទាំងប្រអប់ដាក់គ្រាប់រំសេវចំនួនរាប់សិបប្រអប់ និងកាំភ្លើងជាច្រើនដើមរួមមាន កាំភ្លើង M16s កាំភ្លើងវែងផលិតដោយសហរដ្ឋអាមេរិក ឧបករណ៍សម្រាប់បាញ់គ្រាប់ត្រយ៉ោង កាំភ្លើងស្ពាយបង់ កាំភ្លើងធំ និងរថយន្ដ4WD បំពាក់ដោយម៉ាស៊ីន DShK។ សម្ភារៈទាំងនោះត្រូវបានបន្សល់ទុកចោលដោយភេរវករនៅតំបន់ភាគខាងត្បូងប្រទេសស៊ីរី។ នៅក្នុងចំណោមសម្ភារៈដែលគេរកឃើញក៏មានថ្នាំពេទ្យ និងឧបករណ៍ពេទ្យមួយចំនួនធំ ដែលមានវត្ថុខ្លះផលិតនៅតំបន់ភាគខាងលិច៕
ប្រែសម្រួល៖ ប៉ោក លក្ខិណា
ប្រភពព័ត៌មាន SANA ផ្សាយថ្ងៃទី២ ខែកក្កដា ឆ្នាំ២០២០
