ការបាញ់ប្រហារមួយបានកើតឡើងលើរថយន្ត Infiniti M35 ពណ៌ខ្មៅ នៅតាមបណ្តោយផ្លូវInterstate 580 ក្នុងរដ្ឋរដ្ឋកាលីហ្វ័រញ៉ា (California) បណ្តាលឱ្យមនុស្សចំនួន៤នាក់រងរបួស។
ប៉ូលិសនៅក្នុងតំបន់បានផុសលើបណ្តាញសង្គម Twitter ថា យ៉ាងហោចណាស់មានមនុស្ស៤នាក់រងរបួសនៅរសៀលថ្ងៃពុធនៅក្នុងការបាញ់ប្រហារមួយនៅតាមបណ្តោយផ្លូវ Interstate 580 នៅតំបន់ Oakland ក្នុងរដ្ឋរដ្ឋកាលីហ្វ័រញ៉ា (California)។
នាយកដ្ឋានប៉ូលិស Oakland ថ្លែងថា៖ “នាយកដ្ឋានប៉ូលិស Oakland កំពុងជួយក្រុមល្បាត CHP ក្រោយមកក៏មានការបាញ់ប្រហារកើតឡើងនៅលើផ្លូវ E/B 580 Freeway នៅក្នុងតំបន់ 106 Ave។ មានជនរងគ្រោះចំនួន៤នាក់បានរងរបួសពីការវាយប្រហារនោះ។ ចរាចរណ៍នៅក្នុងតំបន់នោះត្រូវបានបិទ និងត្រូវប្រើផ្លូវជំនួស” ។
គួរបញ្ជាក់ផងដែរថា ការបាញ់ប្រហារបានកើតឡើងនៅម៉ោងប្រហែល ៣និង ៣០នាទី នៅរសៀលថ្ងៃពុធ។ ប៉ូលិសបញ្ជាក់ឱ្យដឹងថា ជនរងគ្រោះទាំង ៤នាក់នៅក្នុងរថយន្ត Infiniti M35 ពណ៌ខ្មៅបានរងរបួសទាំងអស់ ហើយពួកគេត្រូវបានបញ្ជូនទៅមន្ទីរពេទ្យក្នុងស្រុកដើម្បីទទួលបានការព្យាបាល។ ការស៊ើបអង្កេតកំពុងដំណើរការដើម្បីកំណត់ពីមូលហេតុនៃការបាញ់ប្រហារនោះ។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី២ ខែកក្កដា ឆ្នាំ២០២០
