ទូរទស្សន៍ al-Masirah គ្រប់គ្រងដោយក្រុម Houthi រាយការណ៍នៅថ្ងៃព្រហស្បតិ៍ម្សិលមិញ ថា កងកម្លាំងចម្រុះដឹកនាំដោយអារ៉ាប៊ីសាអូឌីតធ្វើការវាយប្រហារតាមអាកាសក្នុងខេត្ត Saada នៅភាគខាងជើងប្រទេសយេម៉ែន។ ការវាយប្រហារនោះបណ្តាលឲ្យស្ត្រី និងក្មេងស្រីម្នាក់ស្លាប់។
ប្រភពដដែលបន្តថា មានកុមារចំនួន ៦នាក់ផ្សេងទៀតបានរងរបួសពីការវាយប្រហារតាមអាកាស ដោយគ្រាប់ធ្លាក់ចំផ្ទះរបស់ក្រុមគ្រួសារមួយនៅភូមិ Makash ក្នុងស្រុក al-Safra នៅភាគខាងកើតនៃខេត្ត Saada ។
គួររំលឹកផងដែរថា ប្រទេសយេម៉ែនបានធ្លាក់ក្នុងសង្គ្រាមស៊ីវិលចាប់តាំងពីចុងឆ្នាំ២០១៤ នៅពេលដែលក្រុមឧទ្ទាម Houthi គាំទ្រដោយអ៊ីរ៉ង់បានកាន់កាប់តំបន់ជាច្រើននៅភាគខាងជើងប្រទេស និងបានបង្ខំរដ្ឋាភិបាលគាំទ្រដោយប្រធានាធិបតីអារ៉ាប៊ីសាអូឌីតលោក Abd-Rabbu Mansour Hadi ចាកចេញពីទីក្រុង Sanaa។ កងកម្លាំងចម្រុះដឹកនាំដោយអារ៉ាប៊ីសាអូឌីតបានធ្វើអន្តរាគមន៍ក្នុងជម្លោះក្នុងប្រទេសយេម៉ែននៅដើមឆ្នាំ២០១៥ ដើម្បីគាំទ្ររដ្ឋាភិបាលលោក Hadi ។
លើសពីនេះ សង្គ្រាមរយៈពេល ៥ឆ្នាំក្នុងប្រទេសយេម៉ែនបានសម្លាប់មនុស្សចំនួនរាប់ពាន់នាក់ និងនាំឲ្យជនស៊ីវិលចំនួន៣លាននាក់ផ្លាស់តីលំនៅ និងជនស៊ីវិលច្រើនជាង ២០លាននាក់ធ្លាក់ក្នុងស្ថានភាពអត់ឃ្លាន។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី០២ ខែមិថុនា ឆ្នាំ២០២០
