នៅថ្ងៃសៅរ៍ ទី០៤ ខែកក្កដា សប្តាហ៍មុន មានហេតុការណ៍បំផ្ទុះគ្រាប់បែកបានកើតឡើងក្នុងទីក្រុង Baidoa នៅភាគនិរតីប្រទេសសូម៉ាលី សម្លាប់មនុស្សចំនួន៥នាក់ និងបណ្តាលឱ្យមនុស្សចំនួន១០នាក់ផ្សេងទៀតរងរបួស។
ក្រុមមន្ត្រីនិយាយថា យ៉ាងហោចណាស់មនុស្សចំនួន ៥នាក់ស្លាប់ និងចំនួន១០នាក់ផ្សេងទៀតរងរបួស ក្រោយពីមានការវាយប្រហារបំផ្ទុះគ្រាប់បែកនៅក្នុងទីក្រុង Baidoa នៅភាគនិរតីប្រទេសសូម៉ាលីនៅថ្ងៃសៅរ៍។
អ្នកនាំពាក្យរដ្ឋាភិបាលសូម៉ាលីលោក Ismael Mukhtar Omar បានបញ្ជាក់ពីការវាយប្រហារនេះ ដោយមានប្រសាន៍ថា ក្រុមសកម្មប្រយុទ្ធ al-Shabab ជាអ្នកស្ថិតនៅពីក្រោយការវាយប្រហារចុងក្រោយបង្អស់នៅក្នុងទីប្រជុំជន Baidoa ដែលជារដ្ឋធានីស្ថិតនៅលើទឹកដីភាគនិរតីនៃប្រទេសសូម៉ាលី។ លោក Omar បានប្រាប់អ្នកសារព័ត៌មានថា៖
“ការផ្ទុះគ្រាប់គ្រាប់បញ្ជាពីចម្ងាយបានសម្លាប់មនុស្សចំនួន៥នាក់ និងបណ្តាលឲ្យមនុស្សចំនួន១០នាក់ផ្សេងទៀតរងរបួស។ជនរងគ្រោះភាគច្រើនជាជនស៊ីវិល ហើយអ្នកស្លាប់ និងរបួសអាចកើនឡើង ព្រោះនេះជារបាយការណ៍ដំបូង” ។
លោក Omar បញ្ជាក់បន្ថែមថា អ្នកស្លាប់ និងរបួសគឺជាជនស៊ីវិលស្លូតត្រង់ដែលតែងតែធ្វើដំណើរប្រចាំថ្ងៃរបស់ពួកគេនៅក្នុងតំបន់នោះ។
អ្នកស្រុកនិយាយថា ការផ្ទុះនេះបានកំណត់គោលដៅលើមជ្ឈមណ្ឌលប្រមូលពន្ធក្នុងស្រុកមួយនៅភាគខាងត្បូងនៃទីប្រជុំជន Baidoa ប៉ុន្តែវាបានផ្ទុះនៅភោជនីយដ្ឋានក្បែរនោះ។
គួររំលឹកផងដែរថា នៅព្រឹកថ្ងៃសៅរ៍ ទី០៤ ខែកក្កដា ដដែលនោះក៏មានការបំផ្ទុះគ្រាប់បែកមួយផ្សេងទៀតបានកើតឡើងនៅមុខទីស្នាក់ការហិរញ្ញវិត្ថុនៅរដ្ឋធានី Mogadishu ដែលបណ្តាលឲ្យមនុស្សចំនួន៧នាក់រងរបួសក្នុងនោះមានទាំងបុគ្គលិកសន្តិសុខផងដែរ។
រដ្ឋាភិបាលសូម៉ាលីបានធ្វើការថ្កោលទោសចំពោះការវាយប្រហារទាំងពីរលើកនេះ ដោយមានប្រសាសន៍ថា ឧប្បត្តិហេតុទាំងពីរនឹងមិនអាចរារាំងការប្តេជ្ញាចិត្តរបស់លោកដើម្បីរក្សាប្រទេសសូម៉ាលីមានស្ថេរភាពនោះទេ។
កងកម្លាំងសន្តិសុខរបស់ប្រទេសសូម៉ាលីដែលគាំទ្រដោយកម្លាំងសម្ព័ន្ធមិត្តបានបង្កើនប្រតិបត្តិការនៅតាមអាកាស និងនៅលើដីរបស់ពួកគេ ដើម្បីប្រឆាំងនឹងក្រុមសកម្មប្រយុទ្ធនៅក្នុងប្រទេស បើទោះបីជានៅតែមានការតស៊ូរបស់ក្រុមសកម្មប្រយុទ្ធដែលបានកំណត់គោលដៅលើមូលដ្ឋានយោធា សណ្ឋាគារ និងកន្លែងសាធារណៈដទៃទៀតក៏ដោយ។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី០៤ ខែកក្កដា ឆ្នាំ២០២០
