ប៉ូលិសនិយាយថាទាហានប៉ារ៉ាដែលជាសមាជិករបស់កងកម្លាំងប៉ូលិសបម្រុងកណ្តាល (CRPF) បានរងរបួសនៅថ្ងៃអាទិត្យក្នុងហេតុការណ៍ផ្ទុះគ្រាប់បែកច្នៃ (IED) ដែលបន្សល់ទុកដោយក្រុមសកម្មប្រយុទ្ធនៅក្នុងតំបន់កាស្មៀរដែលគ្រប់គ្រងដោយប្រទេសឥណ្ឌា។
ការផ្ទុះបានកើតឡើងនៅភូមិ Gangoo ក្នុងស្រុក Pulwama មានចម្ងាយប្រហែល ៣ គីឡូម៉ែត្រពីខាងត្បូងទីក្រុង Srinagar ដែលជារដ្ឋធានីរដូវក្តៅនៃតំបន់កាស្មៀរគ្រប់គ្រងដោយប្រទេសឥណ្ឌា។ មន្ត្រីប៉ូលិសម្នាក់ ដែលគេដកស្រង់សម្តីគាត់នៅក្នុងស្រុក Pulwama បាននិយាយថា សមាជិកទាហានប៉ារ៉ា CRPF ម្នាក់បានរងរបួសនៅក្នុងការផ្ទុះគ្រាប់បែកច្នៃ IED នៅតំបន់ Gangoo។ ជនរងគ្រោះត្រូវបានបញ្ជូនទៅមន្ទីរពេទ្យភ្លាមៗ ដោយស្ថានភាពរបួសរបស់គាត់ត្រូវបានបញ្ជាក់ថាមានស្ថេរភាព។
ក្រោយពីមានហេតុការណ៍ផ្ទុះនេះ ប៉ូលិស និងបុគ្គលិក CRPF បានឡោមព័ទ្ធតំបន់នោះ និងបាននាំសត្វឆ្កែ sniffer ដើម្បីធ្វើការស្រាវជ្រាវ។ មន្ត្រីប៉ូលិសបាននិយាយថា៖ “ក្នុងអំឡុងពេលនៃការស្រាវជ្រាវនេះ គេបានរកឃើញគ្រាប់បែកច្នៃ IEDគ្រាប់មួយបន្ថែម និងត្រូវបានដោះចោលភ្លាម” ។
គួររំលឹកផងដែរថា នៅពេលថ្មីៗនេះការវាយប្រហាររបស់សកម្មប្រយុទ្ធទៅលើក្រុមទាហាន CRPF មានការកើនឡើងគួរឲ្យកត់សម្គាល់។ សង្គ្រាមទ័ពព្រៃកំពុងកើតឡើងរវាងក្រុមសកម្មប្រយុទ្ធ និងកងទ័ពឥណ្ឌាដែលឈរជើងនៅក្នុងតំបន់នោះចាប់តាំងពីឆ្នាំ១៩៨។ ក្រុមសកម្មប្រយុទ្ធតែងតែវាយប្រហារទៅលើកងកម្លាំងរដ្ឋាភិបាលដោយប្រើគ្រាប់បែកច្នៃ។លើសពីនេះ ការផ្ទុះអាវុធរវាងភាគីទាំងសងខាងតែងតែកើតឡើងនៅទូទាំងតំបន់។
នៅថ្ងៃសៅរ៍ សប្តាហ៍មុនផងដែរ សមាជិកសកម្មប្រយុទ្ធពីរនាក់ត្រូវបានសម្លាប់ខណៈដែលទាហាន ៣នាក់រួមទាំងមន្ត្រីថ្នាក់ទាបម្នាក់រងរបួសក្នុងហេតុការណ៍បាញ់កាំភ្លើងយ៉ាងសាហាវមួយនៅតំបន់ Kulgam។ តំបន់កាស្មៀរ ជាតំបន់ Himalayan ដែលបែងចែករវាងប្រទេសឥណ្ឌា និងប្រទេសប៉ាគីស្ថាន ត្រូវប្រទេសទាំងពីរទាមទារការគ្រប់គ្រង។ ចាប់តាំងពីទទួលបានឯករាជ្យពីចក្រភពអង់គ្លេសមកប្រទេសទាំងពីរបានធ្វើសង្គ្រាមចំនួន ៣លើកដើម្បីផ្តាច់ទឹកដីតំបន់កាស្មៀរ។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី០៥ ខែកក្កដា ឆ្នាំ២០២០
