ហេតុការណ៍បំផ្ទុះគ្រាប់បែកអត្តឃាតមួយបានកើតឡើងនៅថ្ងៃអង្គារ ម្សិលមិញ នៅភាគខាងកើតប្រទេសអាហ្វហ្គានីស្ថាន ដោយបានសម្លាប់មន្ត្រីប៉ូលិសចំនួន៣នាក់ និងបណ្តាលឲ្យមនុស្សចំនួន៥នាក់ផ្សេងទៀតរងរបួស។
អ្នកនាំពាក្យរដ្ឋបាលខេត្តបានអះអាងថា នៅថ្ងៃអង្គារ ម្សិលមិញ យ៉ាងហោចណាស់មន្ត្រីប៉ូលិសក្នុងតំបន់អាហ្វហ្គានីស្ថាន (ALP) ចំនួន ៣នាក់បានស្លាប់ និងចំនួន ៥នាក់ផ្សេងទៀតបានរងរបួសក្រោយពីមានគ្រាប់បែកអត្តឃាតក្នុងរថយន្តបានផ្ទុះនៅខេត្ត Nangarhar ភាគខាងកើតប្រទេសអាហ្វហ្គានីស្ថាន។
ការផ្ទុះនេះបានកើតឡើងនៅវេលាម៉ោង ១០ និង៣០នាទីព្រឹក (ម៉ោងក្នុងតំបន់) នៅសង្កាត់ Khewa។ ប៉ូលិសជាតិអាហ្វហ្គានីស្ថានបានការពារទីតាំងនោះក្រោយពីមានហេតុការណ៍ផ្ទុះកើតឡើង។ អ្នកនាំពាក្យលោក Attaullah Khogiani បានប្រាប់ភ្នាក់ងារព័ត៌មានថា ព័ត៌មានដំបូងបានរកឃើញថា មានមនុស្សចំនួន៨នាក់រងផលប៉ះពាល់ពីឧប្បត្តិហេតុនេះ។
គោលដៅជាក់ស្តែងនៃការវាយប្រហារគឺលោក Mir Zaman ជាមេបញ្ជាការ ALP ដែលត្រូវបានសម្លាប់ជាមួយនឹងសមាជិកក្រុម ALP ចំនួនពីរនាក់ផ្សេងទៀត។
លោក Khogyani បានបញ្ជាក់ឲ្យដឹងផងដែរថា ការស៊ើបអង្កេតកំពុងដំណើរការ។
គួរបញ្ជាក់ផងដែថា រហូតមកដល់ពេលនេះ ពុំទាន់មានក្រុមណាមួយចេញមុខអះអាងទទួលខុសត្រូវចំពោះការវាយប្រហារនេះនៅឡើយទេ។
ទោះជាយ៉ាងណា ក្រុមសកម្មប្រយុទ្ធតាលីបង់ និងក្រុមសកម្មប្រយុទ្ធរបស់រដ្ឋអ៊ីស្លាម (IS) មានវត្តមាននៅខេត្តតំបន់ភ្នំដែលមានចម្ងាយ ១២០គីឡូម៉ែត្រខាងកើតទីក្រុងកាប៊ុល។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី០៧ ខែកក្កដា ឆ្នាំ២០២០
