មន្ត្រីក្នុងតំបន់ម្នាក់បានបញ្ជាក់ថា ការផ្ទុះគ្រាប់បែកនៅក្នុងរថយន្តមួយកើតឡើងនៅជំរំយោធារបស់កងទ័ពជាតិអាហ្វហ្គានីស្ថាននៅភាគខាងកើតខេត្ត Wardak នៅព្រឹកថ្ងៃព្រហស្បតិ៍ ម្សិលមិញ ដែលបណ្តាលឱ្យមានការបំផ្លិចបំផ្លាញយ៉ាងច្រើន។
អ្នកនាំពាក្យរដ្ឋបាលខេត្តលោក Muhibullah Sharifzai បានប្រាប់ភ្នាក់ងារព័ត៌មានថា “ការផ្ទុះដ៏ធំមួយបានកើតឡើងនៅខាងក្រៅជំរំ ហើយនៅទីនោះក៏ជានាយកដ្ឋានដឹកជញ្ចូនរបស់កងកម្លាំង ANA ផងដែរនៅម៉ោងប្រហែល ៤រសៀល។ ជំរំនេះមានទីតាំងនៅក្នុងស្រុក Sayyed Abad” ។
លោកបន្តថា ការផ្ទុះនេះបានបណ្តាលឱ្យមានរណ្តៅមួយ និងបានបំផ្លាញជំរំយ៉ាងធ្ងន់ធ្ងរ និងហាងជាច្រើននៅក្នុងសង្កាត់ និងផ្ទះនៅក្បែរៗទីតាំងនោះជាច្រើន។ ប្រភពបន្ថែមថា “មានការភ័យខ្លាចចំពោះគ្រោះថ្នាក់នេះ ហើយព័ត៌មានលម្អិតនឹងត្រូវបានចែករំលែកជាមួយប្រព័ន្ធផ្សព្វផ្សាយនៅពេលក្រោយ បន្ទាប់ពីបានប្រមូលព័ត៌មានបន្ថែមរួច” ។
ប្រភពព័ត៌មានក្នុងស្រុកផ្សាយថា ឡានដឹកទំនិញដែលបង្កប់គ្រាប់បែកបើកបរដោយសមាជិកក្រុមសកម្មប្រយុទ្ធ ប៉ុន្តែកងកម្លាំងសន្តិសុខបានបើកការបាញ់ប្រហារលើរថយន្តនោះ ហើយរថយន្តនោះបានបំផ្ទុះមុនពេលឈានដល់ទីតាំងធំ។
សូមបញ្ជាក់ផងដែរថា រហូតមកដល់ពេលនេះមិនទាន់មានក្រុមណាមួយចេញមុខអះអាងទទួលខុសត្រូវចំពោះការវាយប្រហារនេះទេ។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី០៩ ខែកក្កដា ឆ្នាំ២០២០
