ជនបរទេសចំនួន១០ ត្រូវបានសមត្ថកិច្ចឃាត់ខ្លួននៅទីក្រុងអ៊ីស្តង់ប៊ុល នៅក្នុងប្រទេសតួកគី ដោយសង្ស័យថា ពួកគេជាសមាជិកភេរករឧទ្ទាម IS។
ភ្នាក់ងារសារព័ត៌មានរបស់ Anadolu ដែលគ្រប់គ្រងដោយរដ្ឋផ្សាយថា ប៉ូលិសតួកគីនៅថ្ងៃព្រហស្បតិ៍ ទី០៩ ម្សិលមិញនេះបានឃាត់ខ្លួនជនជាតិបរទេសចំនួន ១០នាក់នៅក្នុងទីក្រុងអ៊ីស្តង់ប៊ុលជុំវិញករណីសង្ស័យថា ពួកគេមានទំនាក់ទំនងជាមួយក្រុមសកម្មប្រយុទ្ធរដ្ឋអ៊ីស្លាម (IS)
អង្គភាពប្រឆាំងភេរវកម្មនៃនាយកដ្ឋានប៉ូលិសអ៊ីស្តង់ប៊ុលបានបើកប្រតិបត្តិការក្នុងពេលដំណាលគ្នានៅអាសយដ្ឋានចំនួន១៤ផ្សេងគ្នានៅទូទាំងទីក្រុងដើម្បីចាប់ជនសង្ស័យ។
ប្រភពដដែលបានបន្ថែមថា សមត្ថកិច្ចបានចាតវិធានាករណ៍តាមដានលើជនសង្ស័យ និងអះអាងថា ជនសង្ស័យទាំងនោះបាន និងកំពុងចែករំលែកព័ត៌មានរបស់អង្គភាពភេរវករនៅលើប្រព័ន្ធផ្សព្វផ្សាយសង្គមអំពីក្រុម IS ។ ប្រភពបន្តថា កាំភ្លើងខ្លីមួយដើម និងឧបករណ៍ទំនាក់ទំនងឥតខ្សែក៏ត្រូវបានដកហូតនៅក្នុងការវាយឆ្មក់នេះដែរ។
សូមរំលឹកផងដែរថា នៅពេលថ្មីៗនេះ ក្រុមប៉ូលិសបានបង្កើនប្រតិបត្តិការរបស់ពួកគេប្រឆាំងនឹងសមាជិកនៃភរវករនៅទូទាំងទីក្រុងអ៊ីស្តង់ប៊ុល។ នៅសប្តាហ៍មុនជនសង្ស័យចំនួន១៧នាក់ផ្សេងទៀតក្នុងនោះមានជនបរទេសចំនួន៩នាក់ត្រូវសមត្ថកិច្ចចាប់ខ្លួននៅក្នុងទីក្រុងពីបទជាប់ពាក់ព័ន្ធនឹងក្រុមសកម្មប្រយុទ្ធ។ សមាជិកក្រុម IS ត្រូវបានគេស្តីបន្ទោសចំពោះការវាយប្រហារដ៏សាហាវជាច្រើនឆ្នាំនៅក្នុងប្រទេសតួកគីដោយការវាយប្រហារទាំងនោះបានសម្លាប់មនុស្សចំនួនច្រើនជាង៣០០នាក់៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី០៩ ខែកក្កដា ឆ្នាំ២០២០
