កងកំលាំងប៉ូលិសបានរុះរើជំរកបណ្តោះអាសន្នមួយនៅឯភាគខាងជើងនៃកំពង់ផែ Calais នៃប្រទេសបារាំងកាលពីថ្ងៃសុក្រដោយបានបណ្តេញជនចំណាកស្រុករាប់រយនាក់។ ការរុះរើនេះគឺជាប្រតិបត្តិការដ៏ធំបំផុតមួយរបស់វាក្នុងរយៈពេលជាច្រើនខែនេះ។
ចាប់តាំងពីការបន្ធូរបន្ថយការបិទប្រទេសដោយសារតែការឆ្លងកូរ៉ូណាវីរុស និងការបើកព្រំដែនឡើងវិញនៅក្នុងសហភាពអឺរ៉ុប ជនចំណាកស្រុកបានចាប់ផ្តើមសម្រុកទៅកំពង់ផែ Calais ម្តងទៀតដោយសង្ឃឹមថានឹងទៅដល់ចក្រភពអង់គ្លេសតាមរយៈChannel Tunnel ។
កាលពីថ្ងៃសុក្រនេះ មនុស្សប្រមាណ ៥១៩ នាក់ដែលរស់នៅក្នុងជំរុំត្រូវបានដឹកតាមឡានក្រុងទៅកាន់មជ្ឈមណ្ឌលទទួលភ្ញៀវផ្សេងៗទៀត។ រ៉យទ័របានដកស្រង់សម្តីអាជ្ញាធរមូលដ្ឋានដែលនិយាយថាមនុស្ស ២០ នាក់ផ្សេងទៀតដែលមានស្ថានភាពអន្តោប្រវេសន៍មិនទៀងទាត់ត្រូវបានចាប់ខ្លួននិងនាំទៅកាន់មណ្ឌលឃុំឃាំង។ ក្រុមមន្ត្រីបាននិយាយថាប្រតិបត្តិការនេះបានប្រព្រឹត្តទៅយ៉ាងរលូន។
គេរាយការណ៍ថាមានជនចំណាកស្រុកប្រមាណ ១២០០ នាក់នៅកំពង់ផែ Calais ភាគច្រើនមកពីស៊ូដង់ អេរីត្រេន អាហ្គានីស្ថាន និងអ៊ីរ៉ង់។ ចាប់តាំងពីការរុះរើ“ Calais Jungle” ដ៏ធំនៅឆ្នាំ ២០១៦ ជាកន្លែងដែលមានប្រជាជនរហូតដល់ទៅ ៩, ០០០ នាក់រស់នៅ ឥឡូវនេះជនចំណាកស្រុកត្រូវបានខ្ចាត់ខ្ចាយនៅក្នុងជំរុំជាច្រើនដែលភាគច្រើននៅជាយកំពង់ផែ Calais នេះ៕
សម្រួល៖ សុផា
ប្រភព RT ចុះផ្សាយថ្ងៃទី ១០ ខែកក្កដា ឆ្នាំ ២០២០
