នៅថ្ងៃអាទិត្យ ទី១២ ម្សិលមិញនេះ មានហេតុការណ៍ប៉ះទង្គិចគ្នារវាងប៉ូលិស និងក្រុមសកម្មប្រយុទ្ធតាលីបង់បណ្តាលឲ្យមនុស្សចំនួន១៦នាក់ស្លាប់ដោយក្នុងនោះមានសមាជិកសកម្មប្រយុទ្ធចំនួន១២នាក់ និងប៉ូលិសចំនួន៤នាក់។
អនុប្រធានប៉ូលិសខេត្តលោក Naqibullah MalPress មានប្រសាសន៍ថា មានមនុស្សស្លាប់សរុបចំនួន១៦នាក់ ដោយក្នុងនោះមានសមាជិកសកម្មប្រយុទ្ធចំនួន១២នាក់ និងប៉ូលិសចំនួន៤នាក់។ ពួកគេស្លាប់នៅពេលមានការប៉ះទង្គិចគ្នានៅក្នុងស្រុកPato នៃខេត្ត Daikundi ក្នុងប្រទេសអាហ្វហ្គានីស្ថាន។
យោងតាមប្រភពព័ត៌មានពីមន្ត្រីបានឲ្យដឹងថា សមាជិកសកម្មប្រយុទ្ធតាលីបង់មួយក្រុមបានធ្វើការវាយឆ្មក់លើប៉ុស្តិ៍ត្រួតពិនិត្យសន្តិសុខនៅក្នុងតំបន់ Tamzan នៃស្រុក Pato នៅព្រឹកថ្ងៃអាទិត្យម្សិលមិញ។ សកម្មភាពនោះបង្កឲ្យមានការប្រយុទ្ធគ្នាយ៉ាងខ្លាំងក្លា និងចុងក្រោយបានបង្ខំឱ្យសមាជិកក្រុមសកម្មប្រយុទ្ធរត់គេចខ្លួនដោយបន្សល់ទុកសាកសពសមាជិកសកម្មប្រយុទ្ធចំនួន១២នាក់។
មន្ត្រីរូបនោះបន្តថា ប៉ូលិសចំនួនបួននាក់ត្រូវបានសម្លាប់ និងម្នាក់ទៀតរងរបួសនៅក្នុងការប្រយុទ្ធគ្នានេះ។ លោកបន្ថែមទៀតថា យន្តហោះប្រយុទ្ធកងសន្តិសុខបានបន្តដេញតាមសមាជិកសកម្មប្រយុទ្ធនៅក្នុងតំបន់នោះ។
យ៉ាងណាមិញ ក្រុមសកម្មប្រយុទ្ធតាលីប៉ង់មិនទាន់ធ្វើការធ្វើការអត្ថាធិប្បាយលើហេតុការណ៍នោះទេ។
គួររំលឹកផងដែរថា នៅថ្ងៃសៅរ៍ ទី១១ សប្តាហ៍មុននេះ មានហេតុការណ៍ប៉ះទង្គិចគ្នាចំនួនពីរ នៅខេត្តពីរផ្សេងគ្នាកើតឡើងដែលបណ្តាលឲ្យសមាជិកតាលីបង់ចំនួន១៦នាក់ត្រូវបានសម្លាប់នៅតំបន់ Kharoti ក្នុងស្រុក Azra នៃខេត្ត Logar និងសមាជិកតាលីបង់ចំនួន០៨នាក់ត្រូវបានសម្លាប់នៅតំបន់ Aboqala នៃស្រុក Andar ក្នុងខេត្ត Ghazni៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី១២ ខែកក្កដា ឆ្នាំ២០២០
