រដ្ឋាភិបាលទីក្រុងហាណូយបានយល់ព្រមបន្តការហោះហើរពាណិជ្ជកម្មទៅកាន់ និងមកពីប្រទេសចិនបន្ទាប់ពីបិទអស់រយៈពេលជាច្រើនខែដោយសារតែជំងឺរាតត្បាតកូរ៉ូណា។ ទោះយ៉ាងណាក៏ដោយ ក្រសួងដឹកជញ្ជូនបាននិយាយកាលពីថ្ងៃចន្ទថាភាពញឹកញាប់និងពេលវេលានៃការហោះហើរនៅតែត្រូវបានពិភាក្សា។
រ៉យទ័របានរាយការណ៍ថាមានការឆ្លងចំនួន ៣៧២ នាក់និងគ្មានការស្លាប់ពីមេរោគកូវីដ ១៩ នោះទេនៅក្នុងប្រទេសវៀតណាមចាប់តាំងពីការផ្ទុះឡើង និងគ្មានការឆ្លងមេរោគសហគមន៍ទេនៅក្នុងរយៈពេលជិត ៣ ខែនេះ។ ប្រការនេះបានអនុញ្ញាតឱ្យប្រជាជាតិអាស៊ីអាគ្នេយ៍ចាប់ផ្តើមបន្តសកម្មភាពសេដ្ឋកិច្ចឆាប់ជាងប្រទេសជាច្រើនទៀត។
ប្រទេសវៀតណាមបានផ្អាករាល់ជើងហោះហើរពាណិជ្ជកម្មទៅនិងមកពីប្រទេសចិនហើយបញ្ឈប់ការចេញទិដ្ឋាការសម្រាប់ភ្ញៀវទេសចរចិននៅក្នុងខែកុម្ភៈបន្ទាប់ពីករណីដំបូងត្រូវបានរកឃើញនៅក្នុងប្រទេសនេះ។ ការផ្អាកទិដ្ឋាការសម្រាប់ភ្ញៀវទេសចរចិននៅតែមាននៅឡើយ។
វិស័យទេសចរណ៍ក្នុងស្រុកនៅប្រទេសវៀតណាមមានការរីកចម្រើនយ៉ាងខ្លាំងដោយគ្មានអ្នកទេសចរបរទេសមកទស្សនាទេ។ ភ្ញៀវទេសចរចិនមានចំនួន ១ ភាគ ៣ នៃភ្ញៀវទេសចរចំនួន ១៨ លាននាក់ដែលបានមកទស្សនាប្រទេសវៀតណាមកាលពីឆ្នាំមុន។ គេមិនទាន់ដឹងច្បាស់ទេថាអ្នកដំណើរមកពីប្រទេសចិននឹងត្រូវស្ថិតនៅក្រោមការបង្ខាំងដែលមានរយៈពេល ១៤ ថ្ងៃសម្រាប់ការធ្វើដំណើរទៅកាន់ប្រទេសនេះទេ៕
សម្រួល៖ សុផា
ប្រភព RT ចុះផ្សាយថ្ងៃទី ១៣ ខែកក្កដា ឆ្នាំ ២០២០