នៅថ្ងៃអាទិត្យ ទី១៩ ខែកក្កដា ឆ្នាំ២០២០ កងកម្លាំង Hashd Shaabi ធ្វើការវាយប្រហារចំនួនពីរលើកក្នុងខេត្ត Salahudin នៅប្រទេសអ៊ីរ៉ាក់ ដោយបានសម្លាប់សមាជិកសកម្មប្រយុទ្ធរដ្ឋអ៊ីស្លាម (IS) ចំនួន០៤នាក់។
នៅក្នុងសេចក្ដីថ្លែងការណ៍របស់កងកម្លាំង Hashd Shaabi រៀបរាប់ដោយសង្ខេបថា កងកម្លាំងជីវពលប្រដាប់អាវុធ Saraya al-Salam ដែលមានទំនាក់ទំនងជាមួយកងកម្លាំង Hashd Shaabi បានសម្លាប់សមាជិកក្រុមសកម្មប្រយុទ្ធ IS ចំនួន០៤នាក់នៅភាគឥសាននៃទីក្រុង Samarra ដែលមានចម្ងាយប្រហែល ១២០គីឡូម៉ែត្រខាងជើងរដ្ឋធានីបាដាដក្នុងប្រទេសអ៊ីរ៉ាក់។
ក្នុងភាពជាកងជីវពលដែលមានទំនាក់ទំនងជាមួយបព្វជិតនិកាយស៊ីអ៊ីត Moqtada al-Sadr ឬ Saraya al-Salam ឬជាអង្គភាពសន្តិភាព មានតួនាទីក្នុងការពង្រាយកងកម្លាំងនៅក្នុងទីក្រុង Samarra ដើម្បីការពារទីសក្ការៈបូជាចំនួនពីរគឺ imams Ali al-Hadi និង Hassan al-Askari។ នៅក្នុងប្រតិបត្តិការនោះក៏បានបណ្តាលឲ្យសមាជិកនៃកងកម្លាំង Hashd Shaabi ចំនួន០២នាក់ស្លាប់ផងដែរ។
កងកម្លាំង Hashd Shaabi បន្តថា នៅក្នុងខេត្ត Salahudin ក៏មានគ្រាប់បែកនៅតាមដងផ្លូវបានផ្ទុះឡើងចំរថយន្តរបស់កងកម្លាំង Hashd Shaabi ក្នុងអំឡុងពេលធ្វើប្រតិបត្តិការប្រឆាំងជាមួយនឹងឧទ្ទាម IS នៅក្នុងតំបន់ al-Jazira។
ឧប្បត្តិហេតុនេះបានកើតឡើងនៅពេលដែលក្រុមសកម្មប្រយុទ្ធ IS ជ្រុលនិយមបានបង្កើនការវាយប្រហាររបស់ពួកគេទៅលើកងកម្លាំងសន្តិសុខរួមទាំងលើកងកម្លាំង Hashd Shaabi និងជនស៊ីវិលនៅក្នុងខេត្ត Sunni បណ្តាលឱ្យមានមនុស្សស្លាប់ និងរបួសជាច្រើននាក់។
ខេត្ត Sunni ធ្លាប់ស្ថិតនៅក្រោមការគ្រប់របស់អតីតរដ្ឋអ៊ីស្លាមពីមុនមក។
គួររំលឹកផងដែរថាស្ថានភាពសន្តិសុខនៅប្រទេសអ៊ីរ៉ាក់មានភាពប្រសើរឡើងចាប់តាំងពីកងកម្លាំងសន្តិសុខអ៊ីរ៉ាក់បានកម្ចាត់ក្រុមសកម្មប្រយុទ្ធឧទ្ទាម IS នៅទូទាំងប្រទេសនៅចុងឆ្នាំ២០១។ ទោះបីជាយ៉ាងណាក៏ដោយ សមាជិកឧទ្ទាម IS នៅសេសសល់បានបង្កប់ខ្លួនតាមទីប្រជុំជន ឬវាលខ្សាច់ និងតំបន់រឹងមាំផ្សេងទៀត ដោយធ្វើការវាយប្រហារឆ្មក់ជាញឹកញាប់ប្រឆាំងនឹងកម្លាំងសន្តិសុខ និងជនស៊ីវិល។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី២០ ខែកក្កដា ឆ្នាំ២០២០