កងកម្លាំងអាហ្វហ្គានីស្ថានធ្វើការវាយប្រហារតាមអាកាសនៅក្នុងប្រតិបត្តិការវាយឆ្មក់ចុងក្រោយប្រឆាំងនឹងក្រុមបះបោរដោយបានសម្លាប់សមាជិកតាលីបង់យ៉ាងហោចណាស់ចំនួន២០នាក់នៅក្នុងខេត្ត Kandahar។
មេបញ្ជាការកងកម្លាំងពិសេសអាហ្វហ្គានីស្ថានមានប្រសាសន៍នៅថ្ងៃអង្គារថា ក្រុមសកម្មប្រយុទ្ធតាលីបង់យ៉ាងតិចចំនួន២០នាក់ត្រូវបានសម្លាប់ក្នុងការវាយប្រហារតាមអាកាសមួយនៅក្នុងខេត្ត Kandahar ភាគខាងត្បូងប្រទេសអាហ្វហ្គានីស្ថាននៅក្នុងប្រតិបត្តិការវាយឆ្មក់ចុងក្រោយប្រឆាំងនឹងក្រុមបះបោរ។
ភ្នាក់ងារប្រតិបត្តិការកងទ័ពពិសេសកងទ័ពជាតិអាហ្វហ្គានីស្ថានបាននិយាយថា៖ “ផ្អែកលើការស៊ើបការណ៍គួរឱ្យទុកចិត្តបានបញ្ជាក់ពីការវាយប្រហារប្រឆាំងនឹងទីតាំងក្រុមតាលីបង់នៅក្នុងភូមិ Maakin និងភូមិ Bagh នៃស្រុក Daman នៅថ្ងៃចន្ទ។ ការវាយប្រហារនោះបណ្តាលឲ្យសកម្មជនតាលីបង់ចំនួន២០នាក់ស្លាប់ និងបានបំផ្លាញរថយន្ត រួមជាមួយម៉ូតូចំនួនមួយគ្រឿងរបស់ក្រុមសកម្មប្រយុទ្ធ”។
កងកម្លាំងអាហ្វហ្គានីស្ថានបានបន្តធ្វើប្រតិបត្តិការបោសសម្អាតនៅរដូវផ្ការីក និងរដូវក្តៅដែលត្រូវបានគេស្គាល់ថា រដូវប្រយុទ្ធកំពុងខិតជិតមកដល់នៅលើតំបន់ភ្នំ។ ក្រុមសកម្មប្រយុទ្ធតាលីបង់បានឆ្លើយតបដោយធ្វើការវាយប្រហារប្រើគ្រាប់បែកនិងធ្វើការវាយប្រហារដោយផ្ទាល់ទៅលើប៉ុស្តិ៍ត្រួតពិនិត្យសន្តិសុខ និងជំរុំយោធា។
គួររំលឹកផងដែរថា នៅថ្ងៃចន្ទ ទី២០ ខែកក្កដា ដើមសប្តាហ៍នេះ អ្នកបំផ្ទុះគ្រាប់បែកអត្តឃាតម្នាក់បានបើកឡានដឹកទំនិញ ដែលមានផ្ទុកទំនិញពេញទៅបំផ្ទុះក្នុងស្រុកSayed Abad នៃខេត្ត Wardak នៅភាគខាងកើតប្រទេសអាហ្វហ្គានីស្ថាន។ ហេតុការណ៍នោះបានសម្លាប់អ្នកបំផ្ទុះគ្រាប់បែកអត្តឃាតរូបនោះ ទាហានចំនួន០៩នាក់ និងបណ្តាលឲ្យទាហានចំនួន០៩នាក់ផ្សេងទៀតរងរបួស៕
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី២១ ខែកក្កដា ឆ្នាំ២០២០
