ក្បួនរថយន្តដឹកទំនិញរបស់អ៊ីរ៉ាក់ដឹកទំនិញគាំទ្រដល់កងកម្លាំងអាមេរិកនៅក្នុងប្រទេសត្រូវបានវាយប្រហារដោយការបំផ្ទុះគ្រាប់បែកនៅតាមដងផ្លូវចំនួនពីរគ្រាប់កាលពីថ្ងៃពុធនេះ។
ទីភ្នាក់ងារសារព័ត៌មាន Anadolu បានដកស្រង់ប្រភពពីប៉ូលិសអ៊ីរ៉ាក់ថា“ គ្រឿងផ្ទុះចំនួន២គ្រាប់បានបំផ្ទុះប៉ះសំបកកង់ឡានដឹកទំនិញរបស់អ៊ីរ៉ាក់ដែលដឹកជំនួយគាំទ្រដល់កងកម្លាំងអាមេរិកនៅលើផ្លូវ Al-Bathaa ក្នុងខេត្ត Dhi Qar។ របាយការណ៍បាននិយាយថាមិនមានអ្នកស្លាប់ និងរបួសទេប៉ុន្តែធ្វើឱ្យខូចខាតដល់សម្ភារៈ និងរថយន្តដឹកទំនិញមួយចំនួន។
គួររំលឹកថាកាលពីជាងពីរសប្តាហ៍មុនខ្មាន់កាំភ្លើងមិនស្គាល់អត្តសញ្ញាណមួយក្រុមបានបញ្ឈប់ក្បួនរថយន្តដឹកទំនិញមួយគ្រឿងផ្សេងទៀតដែលដឹកសម្ភារៈយោធាសម្រាប់សហរដ្ឋអាមេរិក និងកងកម្លាំងចម្រុះនៅក្នុងទីក្រុង Diwaniyah ហើយបានធ្វើការដុតបំផ្លាញរថយន្តដឹកទំនិញទាំងនោះចោល។ កងកំលាំងអាមេរិកជារឿយៗត្រូវបានគំរាមកំហែងដោយកងជីវពល Shia ដែលគាំទ្រដោយអ៊ីរ៉ង់រួមទាំងក្រុម Hezbollah របស់អ៊ីរ៉ាក់។ ពួកគេជាញឹកញាប់ត្រូវបានគេរិះគន់ចំពោះការវាយប្រហារដោយគ្រាប់រ៉ុក្កែតជាប្រចាំទៅលើស្ថានទូតអាមេរិកដែលស្ថិតនៅក្នុងរដ្ឋធានី Baghdad។
អ្នកប្រែសម្រួល៖ គល់ សេងហាក់
ប្រភពព័ត៌មានពី baghdadpost ចេញផ្សាយថ្ងៃទី ២២ ខែកក្តដា ឆ្នាំ២០២០