នៅថ្ងៃពុធរដ្ឋាភិបាល សូម៉ាលីបានច្រានចោលចំពោះការអះអាងរបស់ក្រុមសកម្មប្រយុទ្ធ al-Shabab ដែលថាពួកគេបានសម្លាប់ទាហានរដ្ឋាភិបាលចំនួន០៥នាក់ក្នុងកំឡុងពេលធ្វើប្រតិបត្តិការមួយនៅភាគនិរតីនៃតំបន់ Baidoa។
លោក Ismael Mukhtar Omar អ្នកនាំពាក្យរដ្ឋាភិបាលមានប្រសាសន៍ថា មិនមានការប៉ះទង្គិចគ្នាណាមួយបានកើតឡើងនៅព្រឹកថ្ងៃពុធក្នុងមូលដ្ឋានយោធានៅភូមិ Deynunay ដែលមានចម្ងាយ ២៥គីឡូម៉ែត្រនៅភាគខាងត្បូងនៃតំបន់ Baidoa ដូចការអះអាងរបស់ក្រុមសកម្មប្រយុទ្ធនោះទេ។ លោក Omar បានប្រាប់ភ្នាក់ងារសារព័ត៌មានថា៖
“វាជាការឃោសនាគ្មានមូលដ្ឋាន ហើយពុំមានការប៉ះទង្គិចគ្នាណាមួយបានកើតឡើងក្នុងរយៈពេល ២៤ម៉ោងចុងក្រោយនេះទេ” ។
ការលើកឡើងរបស់លោកបានធ្វើឡើងក្រោយពីក្រុមសកម្មប្រយុទ្ធ al-Shabab បាននិយាយថា យុទ្ធជនរបស់ពួកគេបានវាយដណ្តើមកាន់កាប់មូលដ្ឋានយោធាមួយនៅភូមិ Deynunay ក្បែរតំបន់ Baidoa និងបានសម្លាប់ទាហានរដ្ឋាភិបាលចំនួន០៥នាក់ ហើយក្នុងនោះមានទាំងមេបញ្ជាការចំនួនពីរនាក់។
គួរបញ្ជាក់ផងដែរថា ក្រុមសកម្មប្រយុទ្ធបាន និងកំពុងធ្វើសកម្មភាពប្រឆាំងជាមួយនឹងកងកម្លាំងរដ្ឋាភិបាលក្នុងការវាយប្រហារស្ទើរតែរាល់ថ្ងៃក្នុងគោលបំណងដើម្បីធ្វើការផ្តួលរំលំ រដ្ឋាភិបាល។ ប៉ុន្តែកងកម្លាំងរដ្ឋាភិបាលសូម៉ាលី និងដៃគូបានបង្កើនប្រតិបត្តិការយោធានៅក្នុងទឹកដីដែលគ្រប់គ្រងដោយកងកម្លាំង al-Shabab ក្រោយពីបានបណ្តេញក្រុមបះបោរចេញពីទីក្រុង Mogadishu នៅក្នុងឆ្នាំ ២០១១ ។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃ០៥ ខែ០៨ ឆ្នាំ២០២០