ក្រសួងការបរទេសជំរុញឱ្យរដ្ឋជាប់ព្រំដែនសមុទ្រមេឌីទែរ៉ាណេធ្វើសកម្មភាពតាមច្បាប់អន្តរជាតិ។ ប្រទេសលីប៊ីកាលពីថ្ងៃព្រហស្បតិ៍សប្តាហ៍មុនបានថ្កោលទោសកិច្ចព្រមព្រៀងកំណត់ព្រំដែនសមុទ្ររវាងប្រទេសក្រិក និងប្រទេសអេហ្ស៊ីប នៅដែនសមុទ្រមេឌីទែរ៉ាណេខាងកើត។
អ្នកនាំពាក្យក្រសួងការបរទេសលោក Mohammed Al-Qablawi បាននិយាយនៅលើបណ្តាញសង្គម Twitter ថា “ប្រទេសលីប៊ីនឹងមិនអនុញ្ញាតឲ្យរំលោភលើសិទ្ធិដែនសមុទ្ររបស់ខ្លួនឡើយ” ។
លោក Al-Qablawi បានរំលឹកឡើងវិញនូវការប្តេជ្ញាចិត្តរបស់ប្រទេសលីប៊ីចំពោះអនុស្សរណៈនៃការយោគយល់គ្នាទាក់ទងនឹងការកំណត់ព្រំដែនដែនសមុទ្រ ដែលបានចុះហត្ថលេខាជាមួយប្រទេសទួរគី។
នាថ្ងៃទី២៧ ខែវិច្ឆិកា ប្រទេសតួកគី និងប្រទេសលីប៊ីបានចុះហត្ថលេខាលើកិច្ចព្រមព្រៀង “ការរឹតត្បិតសិទ្ធិដែនសមុទ្រ” ។ កិច្ចព្រមព្រៀងនេះបានកំណត់ផ្នែកមួយ នៃយុត្តាធិការដែនសមុទ្ររបស់ប្រទេសទួរគី នៅក្នុងតំបន់។
លោក Al-Qablawi ក៏បានសង្កត់ធ្ងន់ថា ប្រទេសលីប៊ីទទូចដល់រដ្ឋនានាដែលនៅជាប់សមុទ្រមេឌីទែរ៉ាណេឲ្យធ្វើសកម្មភាពស្របតាមគោលការណ៍នៃច្បាប់អន្តរជាតិ។
ប្រទេសអេហ្ស៊ីបបានប្រកាសនៅព្រឹកថ្ងៃព្រហស្បតិ៍នេះថា ខ្លួនបានចុះហត្ថលេខាលើកិច្ចព្រមព្រៀងទ្វេភាគីជាមួយប្រទេសក្រិក ស្តីពីការកំណត់ព្រំដែននៃដែនសមុទ្ររវាងប្រទេសទាំងពីរ។
ក្រសួងការបរទេសតួកគីបានស្តីបន្ទោស “ការតាំងខ្លួននៅក្នុងកិច្ចព្រមព្រៀង” នៅក្នុងសេចក្តីថ្លែងការណ៍មួយដោយអះអាងថា ប្រទេសក្រិក និងអេហ្ស៊ីបគ្មានព្រំដែនសមុទ្រទៅវិញទៅមកទេហើយកិច្ចព្រមព្រៀងនេះ “ចាត់ទុកជាមោឃៈ” សម្រាប់ទីក្រុងអង់ការ៉ា។
សេចក្តីថ្លែងការណ៍នោះបានបន្ថែមទៀតថា តំបន់កំណត់ព្រំដែននៅក្នុងកិច្ចព្រមព្រៀងមានទីតាំងនៅលើខ្ពង់រាបនៃទ្វីបរបស់តួកគីដូចដែលទីក្រុងអង់ការ៉ាបានរាយការណ៍ ទៅអង្គការសហប្រជាជាតិ៕
អ្នកប្រែសម្រួល៖ ឱក សុវណ្ណារ័ត្ន
ប្រភពព័ត៌មានពី Anadolu Agency ចេញផ្សាយថ្ងៃទី៧ ខែសីហា ឆ្នាំ២០២០
