យោធាអ៊ីរ៉ាក់និយាយនៅថ្ងៃអាទិត្យថា គ្រាប់បែកមួយនៅតាមដងផ្លូវបានវាយប្រហារទៅលើរថយន្តដឹកសម្ភារៈរបស់កងកម្លាំងចម្រុះដែលដឹកនាំដោយសហរដ្ឋអាមេរិកនៅភាគខាងត្បូងប្រទេសអ៊ីរ៉ាក់ ។
ការវាយប្រហារនោះបានកើតឡើងនៅលើដងផ្លូវអន្តរជាតិក្នុងខេត្ត Dhi Qar បណ្តាលឱ្យខូចខាតបន្តិចបន្តួចដល់រថយន្តមួយគ្រឿង។ការិយាល័យប្រព័ន្ធផ្សព្វផ្សាយនៃទីបញ្ជាការប្រតិបត្តិការចម្រុះអ៊ីរ៉ាក់លើកឡើងនៅក្នុងសេចក្តីថ្លែងការណ៍មួយដោយមិនបានបង្ហាញពីពេលវេលាជាក់លាក់នៃការវាយប្រហារនោះទេ។
រហូតមកដល់ពេលនេះ ពុំទាន់មានក្រុមណាមួយអះអាងទទួលខុសត្រូវចំពោះការវាយប្រហារ ក៏ប៉ុន្តែក្រុមសកម្មប្រយុទ្ធដែលមិនស្គាល់អត្តសញ្ញាណបានធ្វើការវាយប្រហារកំណត់គោលដៅជាញឹកញាប់ទៅលើក្បួនរថយន្តរបស់កងកម្លាំងចម្រុះដែលដឹកនាំដោយសហរដ្ឋអាមេរិក ដែលជាធម្មតាធ្វើដំណើរពីប្រទេសកូវ៉ែតទៅកាន់មូលដ្ឋានចម្រុះនៅភាគកណ្តាល និងខាងជើងប្រទេសអ៊ីរ៉ាក់។
ការវាយប្រហារបានកើតឡើងខណៈដែលទំនាក់ទំនងរវាងប្រទេសអ៊ីរ៉ាក់ និងសហរដ្ឋអាមេរិកមានភាពភាពតានតឹងចាប់តាំងពីថ្ងៃទី០៣ ខែមករា មកនៅពេលដែលយន្តហោះគ្មានមនុស្សបើករបស់សហរដ្ឋអាមេរិកបានធ្វើការវាយប្រហារលើក្បួនរថយន្តមួយនៅឯព្រលានយន្តហោះ Baghdad ដោយបានសម្លាប់លោក Qassem Soleimani អតីតមេបញ្ជាការកងកម្លាំងឆ្មាំបដិវត្តអ៊ីស្លាមអ៊ីរ៉ង់ និងលោក Abu Abudidi al-Muhandis អនុប្រធានកងកម្លាំងយោធា Hashd Shaabi ។
កងទ័ពសហរដ្ឋអាមេរិកច្រើនជាងចំនួន ៥០០០នាក់ត្រូវបានដាក់ពង្រាយនៅក្នុងប្រទេសអ៊ីរ៉ាក់ដើម្បីគាំទ្រដល់កងកម្លាំងអ៊ីរ៉ាក់ក្នុងការប្រយុទ្ធប្រឆាំងនឹងក្រុមសកម្មប្រយុទ្ធរដ្ឋអ៊ីស្លាមដែលភាគច្រើនផ្តល់ការបណ្តុះបណ្តាល និងផ្តល់យោបល់ដល់កងកម្លាំងអ៊ីរ៉ាក់ ។
កងកម្លាំងទ័ពគឺជាផ្នែកមួយរបស់កងកម្លាំងចម្រុះដឹកនាំដោយសហរដ្ឋអាមេរិកដែលបាន និងកំពុងធ្វើការវាយឆ្មក់តាមអាកាសប្រឆាំងនឹងគោលដៅឧទ្ទាម IS នៅក្នុងប្រទេសអ៊ីរ៉ាក់ និងប្រទេសស៊ីរី។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១០ ខែសីហា ឆ្នាំ២០២០
