ក្រសួងការបរទេសអ៊ីរ៉ាក់បាននិយាយនៅក្នុងសេចក្តីថ្លែងការណ៍មួយថាប្រទេសអ៊ីរ៉ាក់បានលុបចោលដំណើរទស្សនកិច្ចរបស់រដ្ឋមន្ត្រីក្រសួងការពារជាតិទួរគីមកកាន់ប្រទេសរបស់ខ្លួនដែលបានគ្រោងធ្វើឡើងនៅថ្ងៃព្រហស្បតិ៍នេះ។
ក្រសួងក៏បានកោះហៅឯកអគ្គរដ្ឋទូតទួរគីប្រគល់លិខិតស្នាមតវ៉ា និងជូនដំណឹងអំពីការបដិសេធរបស់អ៊ីរ៉ាក់ចំពោះដំណើរទស្សនកិច្ចនេះ ដោយសារតែមានការវាយប្រហារ និងការរំលោភបំពាននានានៅក្នុងប្រទេសរបស់គាត់ពីសំណាក់ទួរគី។
យោធាអ៊ីរ៉ាក់បាននិយាយថាការវាយប្រហារដោយយន្តហោះគ្មានមនុស្សបើករបស់ទួរគីនៅថ្ងៃអង្គារនេះគឺស្ថិតនៅក្នុងតំបន់ Sidakan ភាគឦសានប្រទេសអ៊ីរ៉ាក់ជិតព្រំដែនទួរគី និងអ៊ីរ៉ង់បានសម្លាប់សមាជិកឆ្មាំព្រំដែនអ៊ីរ៉ាក់ពីរនាក់ និងអ្នកបើកបររថយន្តម្នាក់។
អ្នកប្រែសម្រួល៖ គល់ សេងហាក់
ប្រភពព័ត៌មានពី baghdadpost ចេញផ្សាយថ្ងៃទី ១២ ខែសីហា ឆ្នាំ២០២០