ប៉ូលិសនិយាយថា កម្លាំងរដ្ឋាភិបាលសម្លាប់សមាជិក Naxals ចំនួន០៤នាក់នៅថ្ងៃពុធនេះក្នុងហេតុការណ៍បាញ់ប្រហារជាមួយកងកម្លាំងរដ្ឋាភិបាលនៅរដ្ឋ Chhattisgarh ភាគកណ្តាលប្រទេសឥណ្ឌា។
ហេតុការណ៍បាញ់កាំភ្លើងផ្ទុះឡើងនៅតំបន់ព្រៃ Jagargund ក្នុងស្រុក Sukma ដែលមានចម្ងាយប្រហែល ៥០០គីឡូម៉ែត្រខាងត្បូងទីក្រុង Raipur រដ្ឋធានី Chhattisgarh ។
មន្ត្រីប៉ូលិសម្នាក់និយាយថា “ថ្ងៃនេះ សមាជិក Naxals ចំនួន០៤នាក់ត្រូវកម្លាំងរដ្ឋាភិបាលសម្លាប់ក្នុងហេតុការណ៍ផ្ទុះអាវុធនៅក្នុងព្រៃ Jagargund”។ ការផ្ទុះអាវុធបានកើតឡើងក្រោយពីក្រុមការងារចម្រុះនៃកម្លាំងប៉ូលិសបម្រុងកណ្តាល (CRPF) និងឆ្មាំបម្រុងស្រុក (DRG) ចាប់ផ្តើមធ្វើប្រតិបត្តិការស្រាវជ្រាវលើព័ត៌មានស៊ើបការណ៍សម្ងាត់។ កងកម្លាំងរដ្ឋាភិបាលពុំបានរងគ្រោះថ្នាក់ក្នុងពេលប្រឈមមុខគ្នានោះទេ។
ប៉ូលិសនិយាយថា ប្រតិបត្តិការស្វែងរកកំពុងចាប់ផ្តើមនៅក្នុងតំបន់នោះ។
បច្ចុប្បន្ន ចលនា Naxals មានសកម្មភាពពាសពេញផ្នែកកណ្តាល និងខាងកើតនៃប្រទេសឥណ្ឌា។ អតីតនាយករដ្ឋមន្ត្រីឥណ្ឌាលោក Manmohan Singh ធ្លាប់ចាត់ទុកថា ចលនា Naxalite ជាបញ្ហាប្រឈមផ្នែកសន្តិសុខផ្ទៃក្នុងដ៏ធំបំផុតរបស់ប្រទេសឥណ្ឌា។
ទីក្រុងញូវដែលីថែមទាំអបានពង្រាយកងកម្លាំងប្រដាប់អាវុធជាច្រើនដើម្បីបង្ក្រាបចលនា Naxals នៅក្នុងបន្ទាយរបស់ពួកគេ។ គេរាយការណ៍ថា សកម្មភាពបះប៉ោរសម្លាប់មនុស្សចំនួនរាប់រយនាក់ និងបណ្តាលឲ្យប្រជាជនក្រីក្រចំនួនរាប់ពាន់នាក់គ្មានផ្ទះសម្បែង។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី១២ ខែសីហា ឆ្នាំ២០២០
