កងកម្លាំងការពារ និងសន្តិសុខ Mozambique (FDS) ប្រកាសនៅថ្ងៃពុធថា ក្រុមភេរវករ ចំនួន ៥៩នាក់ត្រូវកម្លាំងការពារជាតិសម្លាប់នៅសប្តាហ៍មុនក្នុងខេត្ត Cabo Delgado ភាគខាងជើងប្រទេស។
មេបញ្ជាការរបស់កម្លាំង FDS និយាយនៅក្នុងសេចក្តីថ្លែងការណ៍មួយថា ក្រុមភេរវករព្យាយាមគ្រប់គ្រងស្រុក Mocimboa da Praia អស់រយៈពេលមួយសប្តាហ៍ ហើយពួកគេបានជ្រៀតចូលសហគមន៍មុនពេលធ្វើសកម្មភាពវាយប្រហារលើភូមិនានា។
នៅក្នុងសកម្មភាពការពារប្រជាជនប្រឆាំងនឹងសកម្មភាពភេរវកម្ម កងកម្លាំងការពារ និងសន្តិសុខទទួលបានលទ្ធផលពីប្រតិបត្តិការផ្សេងៗ ដោយបានសម្លាប់មនុស្សចំនួន៥៩ នាក់ពីក្រុមភេរវករ និងបំផ្លាញជំរុំចំនួន០៦ ដែលភេរវករប្រើប្រាស់។
កម្លាំង FDS បញ្ជាក់ម្តងទៀតនៅក្នុងសេចក្តីថ្លែងការណ៍របស់ខ្លួនពីការប្តេជ្ញាចិត្តស្តារសណ្តាប់ធ្នាប់ និងសន្តិសុខសាធារណៈនៅក្នុងតំបន់នេះឡើងវិញ ដោយបន្ថែមថា ប្រតិបត្តិការប្រឆាំងនឹងការវាយលុករបស់ពួកគេអនុវត្តដើម្បីបង្ក្រាបភេរវជនដែលប្រើប្រាស់ប្រជាជនជាខែលនៅក្នុងតំបន់ដែលស្ថិតនៅក្រោមការត្រួតត្រា។ របាយការណ៍នោះមានសេចក្តីថា៖
“យើងអំពាវនាវឱ្យមានការសហការគ្នាដើម្បីរាយការណ៍ពីអត្ថិភាព ឬចលនាចម្លែក (របស់ជនប្រដាប់អាវុធ) នៅផ្នែកណាមួយលើទឹកដី”៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី១៣ ខែសីហា ឆ្នាំ២០២០
