ប៉ូលិសអៀរឡង់ខាងជើងនិយាយនៅថ្ងៃចន្ទថា មនុស្សចំនួន១០នាក់ត្រូវបានចាប់ខ្លួននៅសប្តាហ៍មុន ក្នុងការស៊ើបអង្កេតមួយលើក្រុម IRA ថ្មីពីបទល្មើសមួយចំនួនទាក់ទងនឹងការដឹកនាំអំពើរភេរវកម្ម និងការសមគំនិតក្នុងការគ្រប់គ្រងអាវុធជាតិផ្ទុះ។
ក្រុម IRA ថ្មី ជាក្រុមសកម្មប្រយុទ្ធមួយក្រុមតូចដែលបានធ្វើការប្រឆាំងនឹងកិច្ចព្រមព្រៀងសន្តិភាពអៀរឡង់ខាងជើងឆ្នាំ១៩៩៨ ហើយពួកគេស្ថិតនៅពីក្រោយការវាយប្រហារមួយចំនួន ដោយក្នុងនោះរួមមានទាំងការសម្លាប់អ្នកកាសែតលោក Lyra McKee នៅឆ្នាំមុន។
មនុស្សចំនួន ១០នាក់ មានបុរសចំនួន៨នាក់ និងស្ត្រីចំនួន២នាក់ជាប់ចោទលើបទល្មើសសរុបចំនួន៣៩ករណី ដោយនោះជាលទ្ធផលនៃការស៊ើបអង្កេត និងទទួលបានការសម្របសម្រួលពីមន្ត្រីប៉ូលិសនៅក្នុងប្រទេសស្កុតឡេន ប្រទេសអៀរឡង់ និងចក្រភពអង់គ្លេស ដែលទទួលបានជំនួយពីភ្នាក់ងារស៊ើបការណ៍សម្ងាត់ក្នុងស្រុក MI5 របស់អង់គ្លេស។
ក្រុម IRA ថ្មីមានទំហំតូចជាងកងកម្លាំងទ័ពសាធារណរដ្ឋអៀរឡង់ (IRA) ដែលត្រូវគេដកហូតអាវុធ ក្រោយពីកិច្ចព្រមព្រៀងសន្តិភាពបានបញ្ចប់ជម្លោះរយៈពេល៣ទសវត្សរវាងអ្នកគាំទ្របាតុកម្មឲ្យមានការបន្តគ្រប់គ្រងទឹកដីពីចក្រភពអង់គ្លេសជាមួយនឹងអ្នកកាន់សាសនាកាតូលិកដែលមានសាមង្គីភាពជាមួយសាធារណរដ្ឋអៀរឡង់។
គួររំលឹកផងដែរថា ក្រុមនេះត្រូវបានបង្កើតឡើងនៅក្នុងឆ្នាំ២០១២ ក្រោយពីក្រុមសកម្មប្រយុទ្ធជាតិនិយមសំខាន់ៗចំនួន៣ ក្នុងចំណោម៤ក្រុម បានរួបរួមបញ្ចូលគ្នាជាលើកដំបូង ចាប់តាំងពីមានកិច្ចព្រមព្រៀងសន្តិភាព តែទោះជាយ៉ាងណាក្រុមជាតិនិយមខុសគ្នាភាគច្រើននៅតែមានចេតនាបង្កអំពើហឹង្សាក្រោមការដឹកនាំតែមួយ។ ក្រុមនោះថែមទាំងធ្លាប់អះអាងទទួលខុសត្រូវផងដែរចំពោះការសម្លាប់ពីរករណីលើមន្ត្រីពន្ធនាគារចំនួនពីរនាក់។
ប្រែសម្រួល៖ ប៉ោក លក្ខិណា
ប្រភពព័ត៌មាន Reuters ផ្សាយថ្ងៃទី២៥ ខែសីហា ឆ្នាំ២០២០
