មនុស្សសរុបចំនួន០៣នាក់រងការសម្លាប់ និងចំនួន០២នាក់ត្រូភេវរកចាប់ខ្លួននៅថ្ងៃពុធ ក្នុងខេត្ត Salahudin និង Diyala នៅប្រទេសអ៊ីរ៉ាក់។
លោក Mohammed al-Bazi ប៉ូលិសខេត្ត Salahudin ប្រាប់ភ្នាក់ងារសារព័ត៌មានថា នៅខេត្ត Salahudin មានគ្រាប់បែកផ្ទុះឡើងតាមដងផ្លូវនៅក្បែររថយន្តស៊ីវិលមួយនៅភាគខាងជើងនៃទីរួមខេត្ត Tirkit ដែលមានចម្ងាយ ១៧០ គីឡូម៉ែត្រនៅខាងជើងទីក្រុងបាកដាដ ដោយបានបំផ្លាញរថយន្ត និងសម្លាប់បងប្អូនប្រុសចំនួនពីរនាក់ និងបណ្តាលឲ្យឪពុករបស់ពួកគេរងរបួស។
នៅក្នុងខេត្ត Diyala ក្រុមសកម្មប្រយុទ្ធរដ្ឋអ៊ីស្លាម (IS) ធ្វើការវាយប្រហារទៅលើភូមិឃឺដមួយនៅជិតទីប្រជុំជន Kanaqin ដែលមានចម្ងាយប្រហែល ១៦៥គីឡូម៉ែត្រភាគឥសាននៃទីក្រុងបាកដាដ ក្នុងប្រទេសអ៊ីរ៉ាក់ ដោយសម្លាប់អ្នកភូមិម្នាក់ និងចាប់ខ្លួនមនុស្សចំនួនពីរនាក់ផ្សេងទៀត។
លោក Abdul-Rahman មានប្រសាសន៍ថា អ្នកវាយប្រហារបានដុតរថយន្តចំនួន០២គ្រឿងផងដែរ មុនពេលពួកគេបានភៀសខ្លួនចេញពីកន្លែងកើតហេតុ ដោយប្រភពបន្ថែមថា កងកម្លាំងសន្តិសុខអ៊ីរ៉ាក់បានពង្រាយនៅជុំវិញភូមិនិងចាត់វិធានាករណ៍ស្វែងរកអ្នកវាយប្រហារ។
ក្រុមសកម្មប្រយុទ្ធ IS ជ្រុលនិយមបានបង្កើនការវាយប្រហាររបស់ខ្លួនទៅលើកម្លាំងសន្តិសុខ និងជនស៊ីវិលនៅក្នុងខេត្ត Sunni ដែលគ្រប់គ្រងដោយអតីតរដ្ឋអ៊ីស្លាមបណ្តាលឱ្យមានមនុស្សស្លាប់ និងរបួសចំនួនរាប់សិបនាក់។
គួររំលឹកផងដែរថា ស្ថានភាពសន្តិសុខនៅប្រទេសអ៊ីរ៉ាក់មានភាពប្រសើរឡើងចាប់តាំងពីកម្លាំងសន្តិសុខអ៊ីរ៉ាក់បានកម្ចាត់ក្រុមសកម្មប្រយុទ្ធ IS នៅទូទាំងប្រទេសនៅចុងឆ្នាំ២០១៧ ។ ទោះជាយ៉ាងណាក៏ដោយ សមាជិក IS នៅសេសសល់បានលាក់ខ្លួននៅក្នុងតំបន់ទីក្រុង ឬតំបន់វាលខ្សាច់ និងតំបន់រឹងមាំ ហើយថែមទាំងធ្វើការវាយឆ្មក់ញឹកញាប់ប្រឆាំងនឹងកម្លាំងសន្តិសុខ និងជនស៊ីវិល។
ប្រែសម្រួល៖ ប៉ោក លក្ខិណា
ប្រភពព័ត៌មានxinhuanet ផ្សាយថ្ងៃទី២៧ ខែសីហា ឆ្នាំ២០២០
