កងកម្លាំងប្រដាប់អាវុធម៉ាលី (FAMa) បានបញ្ជាក់នៅលើគេហទំព័ររបស់ខ្លួនថា កងកម្លាំងប្រដាប់អាវុធម៉ាលីចំនួន០៤នាក់ត្រូវគេសម្លាប់នៅព្រឹកថ្ងៃព្រហស្បតិ៍ក្នុងហេតុការណ៍វាយឆ្មក់មួយនៅក្នុងតំបន់កណ្តាលរបស់សាធារណរដ្ឋម៉ាលី។ កងទ័ពម៉ាលីនិយាយថា៖
“កងកម្លាំង FAMa រងការវាយប្រហារនៅថ្ងៃព្រហស្បតិ៍ទី២៧ ខែសីហាម្សិលមិញនៅវេលាប្រហែលម៉ោង ១០និង ៣០នាទី ដែលមានចម្ងាយប្រហែល ២៥គីឡូម៉ែត្រពីទីក្រុង Konna តាមផ្លូវ Konna-Douentza នៅចន្លោះក្រុង Bima និង Batouma”។
ការវាយប្រហារនោះធ្វើឡើងដោយក្រុមភេរវករ និងបានសម្លាប់ទាហានម៉ាលីចំនួន០៤ នាក់ និងបណ្តាលឲ្យទាហានចំនួន១២នាក់ផ្សេងទៀតរងរបួស។ យោងតាមការចុះផ្សាយរបស់គេហទំព័រផ្លូវការលើកឡើងថា ភាគី FAMa ក៏មានរងការខូចខាតខាងសម្ភារៈយ៉ាងធ្ងន់ធ្ងរផងដែរ។
នៅថ្ងៃសៅរ៍សប្តាហ៍មុន នៅក្នុងតំបន់ Mopti កងរាជអាវុធហត្ថម៉ាលីចំនួន០៤នាក់មកពីក្រុមឃ្លាំមើល និងអន្តរាគមន៍រហ័សត្រូវភេរវករសម្លាប់ និងម្នាក់ទៀតរងរបួសធ្ងន់នៅពេលរថយន្តរបស់ពួកគេបានបុកនឹងគ្រឿងផ្ទុះ។
យ៉ាងណាមិញ ពុំទាន់មានបុគ្គល ឬក្រុមណាមួយចេញមុខអះអាងទទួលខុសត្រូវចំពោះការវាយប្រហារខណៈពេលមានអស្ថិរភាពនយោបាយនៅក្នុងសាធារណរដ្ឋម៉ាលីនោះទេ៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី២៧ ខែសីហា ឆ្នាំ២០២០