យោធាអ៊ីរ៉ាក់បាននិយាយថា នៅថ្ងៃព្រហស្បតិ៍ ទី២៧ ខែសីហា ម្សិលមិញនេះ មានគ្រាប់រ៉ុក្កែត Katyusha ចំនួន០៣ គ្រាប់ធ្លាក់ចំតំបន់បៃតង ដែលជាតំបន់ទទួនមានកិច្ចការពារយ៉ាងខ្លាំងនៅក្នុងរដ្ឋធានីអ៊ីរ៉ាក់។ ការវាយប្រហារនេះមិនបានបណ្តាលឱ្យមានមនុស្សរងគ្រោះនោះទេ។
ការិយាល័យប្រព័ន្ធផ្សព្វផ្សាយនៃបញ្ជាការប្រតិបត្តិការចម្រុះអ៊ីរ៉ាក់ (JOC) បាននិយាយនៅក្នុងសេចក្តីថ្លែងការណ៍ខ្លីមួយថា គ្រាប់រ៉ុក្កែតត្រូវគេបាញ់ចេញពីតំបន់ al-Bejiyah នៅភាគខាងលិចទីក្រុងបាកដាដនៅយប់ថ្ងៃព្រហស្បតិ៍ ហើយគ្រាប់ទាំងនោះធ្លាក់នៅតំបន់បៃតង។
សេចក្តីថ្លែងការណ៍បានបន្ថែមថា គ្រាប់រ៉ុក្កែតទាំងនោះមិនបណ្តាលឱ្យមានមនុស្សស្លាប់និងរបួសឡើយនៅពេលដែលគ្រាប់ទាំងនោះបានធ្លាក់នៅលើវាលទំនេរមួយនៅក្នុងតំបន់។
រហូតមកដល់ពេលនេះពុំទាន់មានក្រុមណាមួយចេញមុខអះអាងទទួលខុសត្រូវចំពោះការវាយប្រហារនេះនៅឡើយទេ។ សូមបញ្ជាក់ថា មូលដ្ឋានយោធាមានទីស្នាក់ការកងទ័ពសហរដ្ឋអាមេរិកនៅទូទាំងប្រទេសអ៊ីរ៉ាក់ និងតំបន់បៃតងក្នុងទីក្រុងបាកដាដរងការវាយប្រហារជាញឹកញាប់ពីកាំភ្លើងធំ និងគ្រាប់រ៉ុក្កែត។
គួររំលឹកផងដែរថា ប្រទេសអ៊ីរ៉ាក់ និងសហរដ្ឋអាមេរិកជួបប្រទះនឹងភាពតានតឹងចាប់តាំងពីថ្ងៃទី០៣ ខែមករាមក ដោយសារតែយន្តហោះគ្មានមនុស្សបើករបស់សហរដ្ឋអាមេរិកបានវាយប្រហារលើក្បួនរថយន្តមួយនៅឯព្រលានយន្តហោះនៅក្នុងទីក្រុងបាកដាដសម្លាប់មេបញ្ជាការកងកម្លាំងឆត្រយោងនៃក្រុមឆ្មាំបដិវត្តអ៊ីស្លាមអ៊ីរ៉ង់លោក Qassem Soleimani និងលោក Abu Mahdi al-Muhandis នាយរងសេនាធិការកងទ័ពប៉ារ៉ាស្ថានក្នុងប្រទេសអ៊ីរ៉ាក់។
ការវាយប្រហារតាមអាកាសរបស់សហរដ្ឋអាមេរិកបានជម្រុញឲ្យសភាអ៊ីរ៉ាក់នៅថ្ងៃទី៥ ខែមករា ធ្វើការអនុម័តដំណោះស្រាយមួយដោយតម្រូវឲ្យរដ្ឋាភិបាលបញ្ចប់វត្តមានរបស់កងកម្លាំងបរទេសនៅក្នុងប្រទេសអ៊ីរ៉ាក់។
កងកម្លាំងទ័ពសហរដ្ឋអាមេរិកមានចំនួនច្រើនជាង៥០០០នាក់ត្រូវគេដាក់ពង្រាយនៅក្នុងប្រទេសអ៊ីរ៉ាក់ដើម្បីគាំទ្រដល់កងកម្លាំងអ៊ីរ៉ាក់ក្នុងការប្រយុទ្ធប្រឆាំងនឹងក្រុមសកម្មប្រយុទ្ធ IS ដែលភាគច្រើនពួកគេផ្តល់ការបណ្តុះបណ្តាល និងផ្តល់យោបល់។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី២៧ ខែសីហា ឆ្នាំ២០២០
