កម្លាំងទ័ពអេហ្ស៊ីបបានប្រកាសនៅថ្ងៃអាទិត្យ ទី៣០ ខែសីហា ម្សិលមិញនេះថា កងកម្លាំងរបស់ពួកគេបានសម្លាប់ភេរវករចំនួន ៧៧នាក់នៅភាគខាងជើងខេត្តស៊ីណៃ។
នៅក្នុងសេចក្តីថ្លែងការណ៍មួយកងកម្លាំងទ័ពបានបញ្ជាក់ថា មន្ត្រីចំនួន៣នាក់ និងទាហានចំនួន៤នាក់ស្លាប់ ឬរងរបួសក្នុងអំឡុងពេលធ្វើប្រតិបត្តិការនៅចន្លោះពីថ្ងៃទី២២ ខែកក្កដា ដល់ថ្ងៃទី ៣០ខែសីហា។
ប្រភពបន្ថែមឱ្យដឹងថា កងកម្លាំងប្រដាប់អាវុធបានចាប់ខ្លួនក្រុមភេរវករដែលរងរបួសដែលបច្ចុប្បន្នពួកគេកំពុងសម្រាកព្យាបាល និងត្រូវៃមត្ថកិច្ចសួរចម្លើយនៅក្នុងមន្ទីរពេទ្យ។ ប្រភពបន្តថា ប្រតិបត្តិការនេះបានបំផ្លាញមូលដ្ឋានរបស់ភេរវករចំនួន៣២៧នាក់ ជាទីតាំងដែលពួកគេប្រើប្រាស់ដើម្បីធ្វើជាកន្លែងលាក់ខ្លួន ជាឃ្លាំង សម្រាប់សមជិកភេរវករស្នាក់នៅ កន្លែងផ្ទុកអាវុធ និងគ្រាប់រំសេវជាច្រើន។
ក្រៅពីនេះ រថយន្តដឹកកង់បួនចំនួន១០គ្រឿង ដែលក្រុមភេរវករប្រើប្រាស់ក៏ត្រូវបានកម្លាំងទ័ពបំផ្លាញចោលផងដែរ។ យ៉ាងណាមិញ សេចក្តីថ្លែងការណ៍បន្ថែមថា រថយន្តកង់ ៤ របស់ក្រុមភេរវករចំនួន៩គ្រឿងដែលផ្ទុកដោយអាវុធនិងគ្រាប់រំសេវត្រូវបានកម្ទេចដោយកងកម្លាំងទ័ពអាកាស ខណៈពេលដែលរថយន្តទាំងនោះព្យាយាមធ្វើដំណើរឆ្លងចូលប្រទេសអេហ្ស៊ីបឆ្លងកាត់ព្រំដែនភាគខាងជាមួយប្រទេសលីប៊ី។
ប្រទេសអេហ្ស៊ីបបាន និងកំពុងប្រយុទ្ធធ្វើប្រតិបត្តិការប្រឆាំងនឹងកសកម្មភាពភេរវកម្មដែលបានសម្លាប់មន្ត្រីប៉ូលិស ទាហាន និងជនស៊ីវិលចំនួនរាប់រយនាក់ចាប់តាំងពីមានការទម្លាក់អតីតប្រធានាធិបតីអ៊ីស្លាមលោក Mohamed Morsi នៅខែកក្កដា ឆ្នាំ២០១៣ មក ។ ការវាយប្រហារភេរវកម្មភាគច្រើនកើតឡើងនៅក្នុងប្រទេសអេហ្ស៊ីបនៅរយៈពេលប៉ុន្មានឆ្នាំចុងក្រោយនេះ និងត្រូវបានអះអាងដោយក្រុមដែលមានមូលដ្ឋាននៅក្នុងខេត្តស៊ីណៃហើយពួកគេមានភាពស្មោះត្រង់នឹងក្រុមភេរវកម្មក្នុងតំបន់រដ្ឋអ៊ីស្លាម។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី៣១ ខែសីហា ឆ្នាំ២០២០
