យោធាអ៊ីរ៉ាក់បាននិយាយថារ៉ុក្កែត Katyusha ២គ្រាប់ បានធ្លាក់នៅក្បែរអាកាសយានដ្ឋានបាដាដ កាលពីថ្ងៃអាទិត្យនេះប៉ុន្តែមិនបណ្តាលឲ្យមានមនុស្សស្លាប់ និងរងរបួសនោះទេ។ ដែលការវាយប្រហារនេះគឺជាការវាយប្រហារលើកទី៣ លើទីតាំងដែលងាយរងគ្រោះនៅក្នុងរដ្ឋធានីនៅសប្តាហ៍នេះ។
គួររំលឹកថាកាលពីថ្ងៃសៅរ៍គ្រាប់រ៉ុក្កែតមួយគ្រាប់បានធ្លាក់នៅក្នុងតំបន់បៃតងដែលមានកំពែងដ៏រឹងមាំរបស់រដ្ឋធានីបាដាដដែលជាអាគាររបស់រដ្ឋាភិបាល និងបេសកកម្មបរទេសខណៈ ៣គ្រាប់ផ្សេងទៀតបានធ្លាក់នៅទីនោះផងដែរកាលពីថ្ងៃព្រហស្បតិ៍នេះ ប៉ុន្តែក៏គ្មានមនុស្សស្លាប់ និងរបួសដែរ។
ទីក្រុងវ៉ាស៊ីនតោនបានបន្ទោសការវាយប្រហារបែបនេះទៅលើក្រុមជីវពលដែលគាំទ្រដោយអ៊ីរ៉ង់។ អ៊ីរ៉ង់មិនបានធ្វើអត្ថាធិប្បាយដោយផ្ទាល់អំពីឧប្បត្តិហេតុនេះទេ។
គួរបញ្ជាក់ថាប្រទេសអ៊ីរ៉ាក់ជាញឹកញាប់ជាកន្លែងនៃការលេចចេញនូវអំពើហឹង្សាពីភាពតានតឹងរវាងអ៊ីរ៉ង់ និងសហរដ្ឋអាមេរិក។
មជ្ឈឹមបូព៌ាបានឈានដល់ជម្លោះដ៏ធំមួយនៅកាលពីខែមករាកន្លងមក បន្ទាប់ពីការវាយប្រហារដោយយន្តហោះគ្មានមនុស្សបើករបស់សហរដ្ឋអាមេរិកបានសម្លាប់ឧត្តមសេនីយ៍អ៊ីរ៉ង់លោក Qassem Soleimani និងមេយោធាអ៊ីរ៉ាក់លោក Abu Mahdi al-Muhandis នៅឯព្រលានយន្តហោះបាដាដ។ កងជីវពលដែលមានសម្ព័ន្ធមិត្តជាមួយអ៊ីរ៉ង់បានស្បថសងសឹកចំពោះការស្លាប់របស់ពួកគេ។
អ្នកប្រែសម្រួល៖ គល់ សេងហាក់
ប្រភពព័ត៌មានពី baghdadpost ចេញផ្សាយថ្ងៃទី ៣០ ខែសីហា ឆ្នាំ២០២០
