រដ្ឋាភិបាលស៊ូដង់ និងក្រុមឧទ្ទាមធំៗបានចុះហត្ថលេខាលើកិច្ចព្រមព្រៀងសន្តិភាព។ គេសង្ឃឹមថា កិច្ចព្រមព្រៀងនេះនឹងបញ្ចប់ជម្លោះប្រដាប់អាវុធដែលអូសបន្លាយ និងសម្លាប់មនុស្សប្រមាណ៣០ម៉ឺននាក់នៅក្នុងប្រទេសអាហ្វ្រិក។
ពិធីចុះហត្ថលេខានៅរដ្ឋធានី Juba ក្នុងប្រទេសស៊ូដង់ខាងត្បូង ធ្វើឡើងនៅថ្ងៃចន្ទ ក្រោយពីមានការពិនិត្យលក្ខខណ្ឌនៃកិច្ចព្រមព្រៀងអស់រយៈពេលពីរថ្ងៃ។ ប្រទេសដែលជាម្ចាស់ផ្ទះបានជួយសម្របសម្រួលដល់កិច្ចចរចាសន្តិភាព។
កិច្ចព្រមព្រៀងសន្តិភាពគ្របដណ្តប់លើបញ្ហាធំៗដូចជាបញ្ហាសន្តិសុខ កម្មសិទ្ធិដីធ្លី ការចែកអំណាច និងការផ្តល់សិទ្ធិដល់ជនភៀសខ្លួន។ មនុស្សប្រហែលជាចំនួន ២,៥លាននាក់បានផ្លាស់ទីលំនៅ ចាប់តាំងពីមានជម្លោះរវាងកងទ័ពរដ្ឋាភិបាលអារ៉ាប់ និងក្រុមឧទ្ទាមមិនមែនអារ៉ាប់នៅភាគខាងលិចតំបន់ Darfur ដែលបានផ្ទុះឡើងក្នុងឆ្នាំ២០០៣ ។ មនុស្សប្រមាណ៣០ម៉ឺននាក់ត្រូវបានសម្លាប់ក្នុងពេលប្រយុទ្ធគ្នា។
សម្ព័ន្ធឧទ្ទាមចុះហត្ថលេខាលើកិច្ចព្រមព្រៀងនេះរួមមានក្រុមឧទ្ទាមមកពីតំបន់ Kordofan និង Blue Nile ដែលមានជាប់ទាក់ទងនឹងសង្គ្រាមស៊ីវិលធំមួយនៅក្នុងប្រទេសស៊ូដង់។ ខេត្តទាំងនោះនៅតែស្ថិតនៅក្រោមអធិបតេយ្យភាពរបស់រដ្ឋាភិបាលស៊ូដង់នៅពេលដែលតំបន់មិនមែនជាផ្នែករបស់ប្រទេសអារ៉ាប់បានបែកបាក់ក្នុងឆ្នាំ២០១១ ដើម្បីបង្កើតប្រទេសស៊ូដង់ខាងត្បូងដែលមានអធិបតេយ្យភាព។
កិច្ចចរចាសន្តិភាពអាចធ្វើទៅបានដោយសារការដួលរលំរបស់មេដឹកនាំដ៏យូរអង្វែងរបស់ប្រទេសស៊ូដង់លោក Omar al-Bashir ដោយលោកត្រូវគេបណ្តេញចេញពីតំណែងនៅខែមេសាឆ្នាំមុន ក្រោយពីលោកបានកាន់អំណាចអស់រយៈពេលពីរទសវត្សរ៍។ រដ្ឋាភិបាលអន្តរកាលបានធ្វើការចរចាជាមួយក្រុមឧទ្ទាមជាកិច្ចការអាទិភាពមួយក្នុងចំណោមអាទិភាពនានារបស់ខ្លួន។
ពីមុនមកមានការប៉ុនប៉ងបញ្ចប់ជម្លោះនៅប្រទេសស៊ូដង់ដោយមានកិច្ចព្រមព្រៀងសន្តិភាពមួយត្រូវបានចុះហត្ថលេខានៅប្រទេសនីហ្សេរីយ៉ាក្នុងឆ្នាំ២០០៦ និងមួយផ្សេងទៀតនៅប្រទេសកាតាក្នុងឆ្នាំ២០១០ ដែលក្រោយមកកិច្ចព្រមព្រៀងទាំងពីរនោះបានបរាជ័យ។
ប្រែសម្រួល៖ ប៉ោក លក្ខិណា
ប្រភពព័ត៌មាន RT ផ្សាយថ្ងៃទី៣១ ខែសីហា ឆ្នាំ២០២០
