ភ្នាក់ងារសារព័ត៌មានជាតិបានរាយការណ៍ថា នៅថ្ងៃអង្គារ ទី០១ ខែកញ្ញា ម្សិលមិញនេះអាជ្ញាធរប្រទេសលីបង់ចាប់ខ្លួនមន្ត្រីចំនួន៤នាក់នៅឯកំពង់ផែ Beirut ជុំវិញការផ្ទុះដែលធ្វើឱ្យរញ្ជួយអគារនៅថ្ងៃទី០៤ ខែសីហា ដោយហេតុការណ៍បានសម្លាប់មនុស្សចំនួន១៩០នាក់ និងបណ្តាលឲ្យមនុស្សចំនួន៦៥០០នាក់ផ្សេងទៀតរងរបួស។
មន្ត្រីដែលត្រូវបានចាប់ខ្លួនមានលោកឧត្តមសេនីយ៍ Antoine Salloum ប្រធាននាយកដ្ឋានស៊ើបការណ៍សម្ងាត់នៅឯកំពង់ផែ លោក Joseph al-Naddaf ជាបុគ្គលិកសន្តិសុខក្នុងក្របខណ្ឌរដ្ឋ លោក Charbel Fawaz និងលោក Daoud Fayad ជាបុគ្គលិកធ្វើការនៅក្នុងនាយកដ្ឋានសន្តិសុខទូទៅ។
ការផ្ទុះដ៏កក្រើកចំនួនពីរបានធ្វើឱ្យរញ្ជួយកំពង់ផែ Beirut នៅថ្ងៃទី០៤ ខែសីហា ហើយថែមទាំងបណ្តាលឲ្យមានការរញ្ជួយអគារនៅទូទាំងរដ្ឋធានីរបស់ប្រទេសលីបង់។ ការស៊ើបអង្កេតបឋមបានបង្ហាញថាការផ្ទុះនោះកើតមានពីអាម៉ូញ៉ូមនីត្រាតចំនួន២៧០០តោន កាំជ្រួចចំនួន២៤តោន ប្រេងកាត មេតាន និងអាសូត។
គួរបញ្ជាក់ផងដែរថា បើយោងតាមប្រភពព័ត៌មានពីធនាគារពិភពលោកបង្ហាញថា ការខូចខាតបណ្តាលមកពីការផ្ទុះនេះមានតម្លៃដល់ទៅចំនួន ៤,៦ពាន់លានដុល្លារអាមេរិក។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី០២ ខែកញ្ញា ឆ្នាំ២០២០
