មនុស្សចំនួន០៦នាក់បានរងរបួសនៅព្រឹកថ្ងៃពុធ ទី០២ ខែកញ្ញា នៅពេលដែលជនសង្ស័យនៅក្នុងរថយន្ដមួយធ្វើការបាញ់ប្រហារទៅលើមនុស្សមួយក្រុមនៅខាងក្រៅហាងនំ២៤ ម៉ោងនៅទីក្រុង Toronto ក្នុងប្រទេសកាណាដា។
ការបាញ់ប្រហារនោះកើតឡើងនៅម៉ោង២ ព្រឹកនៅថ្ងៃពុធ ទី០២ ម្សិលមិញនេះ។ មនុស្សមួយក្រុមបានប្រមូលផ្តុំគ្នាខាងក្រៅហាងនំ ខណៈមេឃកំពុងមានភ្លៀងធ្លាក់ ហើយក្រោយមកជនសង្ស័យនៅក្នុងរថយន្ត SUV មួយបានបាញ់រះទៅលើពួកគេ។
ជនរងគ្រោះទាំង០៦នាក់ ក្នុងនោះមានប្រុសចំនួន០៥នាក់ និងស្រីចំនួន០១នាក់ រងគ្រាប់កាំភ្លើង ហើយត្រូវគេដឹកបញ្ជូនទៅមន្ទីរពេទ្យដើម្បីព្យាបាលក្នុងស្ថានភាពពុំមានគ្រោះថ្នាក់ដល់អាយុជីវិត។ លោក John Tory អភិបាលក្រុង Toronto មានប្រសាសន៍ថា លោកបាននិយាយជាមួយមេប៉ូលិសអំពីការបាញ់ប្រហារភ្លាមៗ ក្រោយពីមានឧប្បត្តិហេតុកើតឡើង។
លោក Tory មានប្រសាសន៍ថា៖“យើងមើលឃើញបញ្ហាបន្តកើតមាន នៅពេលដែលយើងឆ្លងកាត់រដូវក្តៅជាមួយសកម្មភាពរបស់ក្រុមទំនើង ដោយក្មេងទំនើងទាំងនោះមានជាប់ទាក់ទងនឹងការជួញដូរកាំភ្លើង ហើយពួកគេថែមទាំងមានពាក់ព័ន្ធនឹងគ្រឿងញៀន និងការជួញដូរមនុស្ស” ៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ផ្សាយថ្ងៃទី០២ ខែកញ្ញា ឆ្នាំ២០២០
