ប្រទេសអាហ្វ្រិកភាគខាងកើតប្តេជ្ញា “រាំងស្ទះ” រាល់មធ្យោបាយហិរញ្ញវត្ថុទាំងអស់ ដែលគាំទ្រក្រុមភេរវកម្មអាល់កៃដាដែលជាប់ទាក់ទងនឹងក្រុមភេរវកម្មអាល់សាបាប។
ក្រសួងមហាផ្ទៃរបស់ប្រទេសកេនយ៉ាកាលពីថ្ងៃពុធ បានដាក់ឈ្មោះភេរវជនកំពូលៗ ចំនួន៩នៃសកម្មភាពភេរវកម្មដែលបានអនុវត្តដោយអាល់កៃដាដែលមានមូលដ្ឋាននៅសូម៉ាលី ដែលជាប់ទាក់ទងនឹងក្រុមសកម្មប្រយុទ្ធអាល់សាបាប។
នៅក្នុងសេចក្តីថ្លែងការណ៍មួយលោក Fred Matiang’I បានដឹកនាំការរឹបអូសទ្រព្យសម្បត្តិទាំងអស់ និងថវិកាដែលទុកសម្រាប់គាំទ្រក្រុមសកម្មប្រយុទ្ធអាល់សាបាប ដែលបង្កការបំផ្លិចបំផ្លាញនៅអាហ្វ្រិកខាងកើត បណ្តាលឱ្យមានមនុស្សរាប់ពាន់នាក់ស្លាប់ និងការបំផ្លិចបំផ្លាញទ្រព្យសម្បត្តិ។
ទូរទស្សន៍ពលរដ្ឋកេនយ៉ាបានដកស្រង់សំដីរបស់លោក Matiang’I ដែលនិយាយថា “វិធីតែមួយគត់ដើម្បីបដិសេធភេរវករនូវមធ្យោបាយ ដើម្បីគំរាមកំហែងដល់ជីវិតរស់នៅ គឺការបិទបណ្តាញសម្របសម្រួលរបស់ពួកគេ និងនេះជាមូលហេតុដែលខ្ញុំបានចុះផ្សាយបញ្ជីខាងលើដូច្នេះពួកគេមិនអាចផ្តល់ហិរញ្ញប្បទានដល់ប្រតិបត្តិការរបស់អាល់សាបាបនៅក្នុងព្រំដែនរបស់យើងទេ”
ជនជាប់ចោទទាំងនោះរួមមាន Halima Adan Ali, Waleed Ahmed Zein, Sheikh Guyo Gorsa Boru, Mohammed Abdi Ali (Abu Fidaa), Nuseiba Mohammed Haji, Abdimajit Adan Hassan, Mohammed Ali Abdi, Muktar Ibrahim Ali និង Mire Abdullahi Elmi ។
ប្រទេសកេនយ៉ាចូលរួមចំណែកជួយដល់បេសកកម្មរក្សាសន្តិភាពរបស់សហភាពអាហ្វ្រិកនៅប្រទេសសូម៉ាលី ដែលបណ្តាលឱ្យក្រុមសកម្មប្រយុទ្ធអាល់សាបាបចុះខ្សោយ ក្នុងការផ្តួលរំលំរដ្ឋាភិបាលសូម៉ាលីអស់រយៈពេលជាច្រើនឆ្នាំកន្លងមកនេះ។
ក្រុមសកម្មប្រយុទ្ធអាល់សាបាបបានប្តេជ្ញាអនុវត្តការវាយប្រហារភេរវកម្ម នៅក្នុងប្រទេសកេនយ៉ារហូតដល់កេនយ៉ាដកទាហានរបស់ខ្លួនចេញពីប្រទេសសូម៉ាលី។ ក្នុងឆ្នាំ២០១៥ និស្សិតសាកលវិទ្យាល័យជាង១៤០នាក់ ត្រូវសម្លាប់ ក្នុងការវាយប្រហារនៅក្នុងប្រទេសកេនយ៉ា៕
អ្នកប្រែសម្រួល៖ ឱក សុវណ្ណារ័ត្ន
ប្រភពព័ត៌មានពី Anadolu Agency ចេញផ្សាយថ្ងៃទី២ ខែកញ្ញា ឆ្នាំ២០២០
