មន្ត្រីយោធាប្រាប់បណ្តាញសារព័ត៌មានថា កងកម្លាំងស្មោះត្រង់នឹងរដ្ឋាភិបាលយេម៉ែនសម្លាប់សមាជិកឈានមុខម្នាក់របស់ក្រុមឧទ្ទាម Houthi នៅភាគខាងត្បូងខេត្ត Dhalea នៅថ្ងៃព្រហស្បតិ៍ ទី០៣ ខែកញ្ញា ម្សិលមិញនេះ។
ប្រភពយោធាក្នុងតំបន់សុំមិនបញ្ចេញឈ្មោះបាននិយាយថា៖ “មេបញ្ជាការមូលដ្ឋានម្នាក់រួមជាមួយអង្គរក្សរបស់គាត់ត្រូវសមត្ថកិច្ចសម្លាប់ក្នុងពេលប្រឈមមុខដាក់គ្នាជាមួយកងកម្លាំងរដ្ឋាភិបាលនៅភាគខាងជើងខេត្ត Dhalea” ប្រភពបន្ថែមថា “ក្រុមឧទ្ទាម Houthi ដាក់ពង្រាយយុទ្ធជនរបស់ខ្លួនក្នុងគោលបំណងដើម្បីដណ្តើមការកាន់កាប់តំបន់នានានៅភាគខាងជើងខេត្ត Dhalea” លោកបញ្ជាក់ថា “កងកម្លាំងរដ្ឋាភិបាលបានបង្ក្រាបលើក្រុមឧទ្ទាម Houthis ដោយសម្លាប់សមាជិកឧទ្ទាមនាំមុខម្នាក់ និងអង្គរក្សរបស់គាត់ចំនួន០៤នាក់ក្នុងពេលប្រយុទ្ធគ្នា” ។
អ្នកស្រុកបានប្រាប់ភ្នាក់ងារសារព័ត៌មានថា មានការប្រយុទ្ធគ្នាកាន់តែខ្លាំងនាពេលថ្មីៗនេះរវាងគូប្រជែងសង្គ្រាមទាំងពីរលើការគ្រប់គ្រងតំបន់សំខាន់ៗនៅភាគខាងជើងនៃទីក្រុង Dhalea។ គ្រាប់កាំភ្លើងធំមួយចំនួនបានធ្លាក់នៅលើផ្ទះប្រជាជន ដែលវាជាលទ្ធផលនៃការប្រយុទ្ធគ្នានៅទីនោះ។
គួររំលឹកផងដែរថា នៅឆ្នាំមុន យុទ្ធជន Houthi ដែលជាសម្ព័ន្ធមិត្តរបស់អ៊ីរ៉ង់បានបើកការវាយប្រហារប្រដាប់ដោយអាវុធយ៉ាងខ្លាំងទៅលើទីតាំងរបស់កងកម្លាំងរដ្ឋាភិបាលយេម៉ែននិងបានជោគជ័យក្នុងការដណ្តើមកាន់កាប់លើតំបន់សំខាន់ៗនៅជាយខេត្ត Dhalea។
គេបន្តឃើញមានការប្រយុទ្ធគ្នាឥតឈប់ឈរនៅតាមតំបន់នានានៅភាគខាងជើង និងភាគខាងលិចនៃទីក្រុងDhalea រវាងកងកម្លាំងរដ្ឋាភិបាល និងក្រុមយុទ្ធជន Houthi អស់រយៈពេលប្រហែល០៤ឆ្នាំ។
ប្រទេសយេម៉ែនរងការញាំញីពីសង្គ្រាមស៊ីវិលចាប់តាំងពីចុងឆ្នាំ២០១៤ នៅពេលដែលកងជីវពល Houthi បានបង្ខំរដ្ឋាភិបាល អន្តរជាតិទទួលស្គាល់ប្រធានាធិបតីលោក Abd-Rabbu Mansour Hadi ឱ្យនិរទេសខ្លួន៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០៤ ខែកញ្ញា ឆ្នាំ២០២០
