នៅថ្ងៃព្រហស្បតិ៍ ទី០៣ ខែកញ្ញា ប្រធានាធិបតីតួកគី លោក Recep Tayyip Erdogan បានជជែកជាមួយអធិការបតីអាឡឺម៉ង់លោកស្រី Angela Merkel តាមរយៈសន្និសីទវីដេអូស្តីពីកិច្ចការក្នុងតំបន់ជាពិសេសពិក្សាពីភាពតានតឹងចុងក្រោយនៅភាគខាងកើតសមុទ្រមេឌីទែរ៉ាណេ។
“នៅក្នុងសន្និសីទវីដេអូ លោកប្រធានាធិបតី Erdogan បានបញ្ជាក់ជាថ្មីពីការប្តេជ្ញាចិត្តរបស់លោកចំពោះការបែងចែកថាមពល (ធនធានថាមពល) ដែលជាសិទ្ធិរបស់ប្រទេសតួកគី និងកោះ Cypriots នៅមេឌីទែរ៉ាណេខាងកើត ដែលនឹងទទួលបានកិច្ចការពារ និងបម្រើផលប្រយោជន៍ដល់រដ្ឋជាប់ដែនទឹកទាំងអស់”នេះបើយោងទៅតាមសេចក្តីថ្លែងការណ៍របស់ការិយាល័យទំនាក់ទំនងប្រធានាធិបតីតួកគី។
សេចក្តីថ្លែងការណ៍បាននិយាយថា លោក Erdogan បានចោទប្រកាន់ប្រទេសក្រិកឬកោះCypriots ក្រិក និងរដ្ឋដែលគាំទ្រ ដែលបានចាត់វិធានការដើម្បីបង្កើនភាពតានតឹង។ លោក Erdogan ក៏បានបញ្ជាក់ផងដែរថា លោកស្វាគមន៍ចំពោះកិច្ចខិតខំប្រឹងប្រែងរបស់លោកស្រី Merkel ក្នុងការចូលរួមចំណែកដើម្បីដោះស្រាយបញ្ហាដោយសារតែមានការបង្កើតជំហ៊ានថ្មីៗពីប្រទេសក្រិក និងក្រុមអ្នកគាំទ្របំផ្លាញសន្តិភាពនៅក្នុងតំបន់។
គួររំលឹកផងដែរថា ទីក្រុងអាតែន និងអង់ការ៉ាមានទំនាស់លើសិទ្ធិគ្រប់គ្រងអ៊ីដ្រូកាបូន(hydrocarbon)នៅភាគខាងកើតសមុទ្រមេឌីទែរ៉ាណេ។ ប្រទេសតួកគីបានបញ្ជូននាវាស៊ើបការណ៍របស់ខ្លួនឈ្មោះ Oruc Reis ដែលអមដំណើរដោយនាវាចម្បាំងតួកគី ទៅកាន់តំបន់នោះក្រោយពីប្រទេសក្រិកនិងប្រទេសអេហ្ស៊ីបបានចុះហត្ថលេខាលើកិច្ចព្រមព្រៀងលើព្រំដែនសមុទ្រ៕
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០៣ ខែកញ្ញា ឆ្នាំ២០២០
