កាលពីថ្ងៃព្រហស្បតិ៍នេះក្រុមភេរវករ ISIS បានធ្វើការវាយប្រហារប្រឆាំងនឹងកម្លាំងសន្តិសុខអ៊ីរ៉ាក់នៅភាគខាងលិចខេត្ត Anbar បណ្តាលឱ្យមនុស្សស្លាប់ និងរបួសយ៉ាងហោចណាស់៥នាក់។
ប្រភពសន្តិសុខបានបញ្ជាក់ប្រាប់ប្រព័ន្ធផ្សព្វផ្សាយក្នុងស្រុកជាច្រើនថា ការវាយប្រហារភ្លាមៗនៅពេលយប់របស់ក្រុមរដ្ឋអ៊ីស្លាមបានតម្រង់គោលដៅលើទីស្នាក់ការរបស់ឆ្មាំព្រំដែនស្ថិតនៅតំបន់ Makr al-Naam ជិតព្រំដែនអ៊ីរ៉ាក់ – អារ៉ាប៊ីសាអូឌីតដោយបានសម្លាប់ប៉ូលិស២នាក់ និងបណ្តាលឱ្យរងរបួសទាហាន៣នាក់ផ្សេងទៀត។
គួរបញ្ជាក់ថាក្នុងរយៈពេលប៉ុន្មានសប្តាហ៍កន្លងមកនេះក្រុម ISIS បានបង្កើនការវាយប្រហារជាពិសេសវាយប្រហានៅខាងក្រៅក្រុងនានាដោយប្រើវិធីធ្វើសង្គ្រាមទ័ពព្រៃបន្ទាប់ពីការបរាជ័យរបស់ខ្លួនក្នុងឆ្នាំ២០១៧ ។
មន្ត្រីជាន់ខ្ពស់អ៊ីរ៉ាក់និយាយថាក្រុម ISIS នៅតែបន្តគម្រាមកំហែងនៅក្នុងតំបន់ជាច្រើនដែលធ្លាប់ស្ថិតនៅក្រោមការគ្រប់គ្រងរបស់ពួកគេក្នុងអំឡុងពេលកាន់កាប់ទឹកដីធំៗ នៅក្នុងប្រទេសកាលពី ៦ ឆ្នាំមុន។
កងកំលាំងសន្តិសុខអ៊ីរ៉ាក់ថ្មីៗនេះបានបើកប្រតិបត្តិការបោសសម្អាតយោធាថ្មីមួយស្ថិតនៅក្នុងតំបន់ Wadi Houran ស្ថិតនៅតាមព្រំដែន Al-Qaim ដែលជាផ្នែកមួយនៃយុទ្ធនាការយោធាដែលបានរួមបញ្ចូលនៅក្នុងតំបន់ធំៗ ដើម្បីកំចាត់សមាជិកក្រុម ISIS។
កងទ័ពអ៊ីរ៉ាក់បានបញ្ជាក់ជាច្រើនដងថាតំបន់ដែលលាតសន្ធឹង និងរដុបគឺជាកន្លែងដែលរឹងមាំសម្រាប់ក្រុមភេរវជនដែលនៅសេសសល់។
អ្នកប្រែសម្រួល៖ គល់ សេងហាក់
ប្រភពព័ត៌មានពី baghdadpost ចេញផ្សាយថ្ងៃទី ៣ ខែកញ្ញា ឆ្នាំ២០២០
