ប្រភពព័ត៌មានពីប៉ូលិសបានឲ្យដឹងថា នៅយប់ថ្ងៃអង្គារ ទី០៨ ខែកញ្ញា មនុស្សចំនួន០២នាក់ស្លាប់ និងចំនួន០៣នាក់ផ្សេងទៀតរងរបួសក្នុងហេតុការណ៍បាញ់ប្រហារពីខ្មាន់កាំភ្លើងដែលមិនស្គាល់អត្តសញ្ញាណនៅក្នុងទីក្រុង Rawalpindi ខេត្ត Punjab នៅភាគខាងកើតប្រទេសប៉ាគីស្ថាន។
យោងតាមប្រភពការស៊ើបអង្កេតដំបូងរបស់ប៉ូលិសបានអោយដឹងថា ខ្មាន់កាំភ្លើងចំនួន០៣នាក់បានបើកការបាញ់ប្រហារទៅលើប្រជាជន ដែលឈរជើងនៅតាមដងផ្លូវ ក្រោយមកក្មាន់កាំភ្លើងទាំងនោះបានរត់គេចពីកន្លែងកើតហេតុនៅជាយក្រុង Rawalpindi ដែលជាទីក្រុងភ្លោះនៃរដ្ឋធានីអ៊ីស្លាម៉ាបាដ។
ប្រភពព័ត៌មាននិយាយថា ប៉ូលិសបានទៅដល់ទីតាំងវាយប្រហារ ក្រោយពីឧប្បត្តិហេតុនេះបានកើតឡើង ដោយបន្ថែមថាអ្នករងរបួសត្រូវគេបញ្ជូនទៅកាន់មន្ទីរពេទ្យក្បែរនោះ។ជនរងគ្រោះទាំង០៣នាក់ស្ថិតក្នុងស្ថានភាពធ្ងន់ធ្ងរ។
ពុំទាន់មានក្រុមណាមួយ ឬបុគ្គលណាម្នាក់អះអាងពីការវាយប្រហារនេះនៅឡើយទេ។
ប៉ូលិសបានបន្តប្រតិបត្ដិការស្វែងរកនៅក្នុងតំបន់នោះដើម្បីតាមដានក្រុមអ្នកវាយប្រហារដែលកំពុងរត់គេចខ្លួន។
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី៩ ខែកញ្ញា ឆ្នាំ២០២០
