មេបញ្ជាការយោធាក្នុងតំបន់មានប្រសាសន៍ថា យ៉ាងហោចណាស់អ្នកប្រយុទ្ធ Abu Sayyaf ចំនួន0៥នាក់ ត្រូវកងកម្លាំងសន្តិសុខសម្លាប់ និងទាហានចំនួន០២នាក់រួមជាមួយមន្ត្រីយោធាវ័យក្មេងម្នាក់បានរងរបួសនៅពេលដែលកងកម្លាំងសន្តិសុខប្រយុទ្ធជាមួយក្រុមភេរវករ Abu Sayyaf នៅភាគខាងត្បូងប្រទេសហ្វីលីពីនមុនពេលថ្ងៃរះនៅថ្ងៃពុធ។
លោកវរសេនីយ៍ Don Templonuevo មេបញ្ជាការកងវរសេនាតូចថ្មើរជើងលេខ៤៤របស់កងទ័ពមានប្រសាសន៍ថា ការផ្ទុះអាវុធបានកើតឡើងនៅម៉ោងប្រហែល២រំលងអធ្រាត្រម៉ោងនៅក្នុងភូមិមួយក្នុងខេត្ត Zamboanga Sibugay នៅពេលដែលកងកម្លាំងបានតាមដានលើក្រុមភេរវករមួយក្រុម។
លោក Templonuevo បន្ថែមថា ការផ្ទុះអាវុធពេលព្រឹកព្រលឹមមានរយៈពេលពេល ៣០នាទីហើយកងទ័ពត្រូវគេបញ្ជូនទៅកាន់តំបន់នោះក្រោយពីអ្នកភូមិបង្ហាញថា មានវត្តមានរបស់បុរសប្រដាប់ដោយអាវុធ។ លោកបន្ថែមថា កងកម្លាំងរដ្ឋាភិបាលបានរកឃើញអាវុធដែលមានសមត្ថភាពខ្ពស់ចំនួន០៤ដើម ក្រោយពីមានការប៉ះទង្គិចគ្នារយៈពេល៣០នាទីក្នុងការប្រឆាំងនឹងសមាជិក Abu Sayyaf ចំនួន១០នាក់។លោកTemplonuevoបន្ថែមថាភេរវករទាំងនោះបានរត់គេចខ្លួន។ លោកមានប្រសាសន៍ថា“ ប្រតិបត្តិការដេញតាមនៅតែបន្ត។
លោកឧត្តមសេនីយ៍ Leonel Nicolas មេបញ្ជាការកងពលតូចថ្មើរជើងលេខ ១០២ មានប្រសាសន៍ថា ក្រុមភេរវករកំពុងលាក់ខ្លួននៅក្នុងភូមិ និងបានចាប់ខ្លួនអ្នកជួញដូរម្នាក់។
លោក Nicolas មានប្រសាសន៍ថា “ប្រតិបត្តិការស្វែងរកកំពុងបន្តដើម្បីបង្ក្រាបមាជិកដែលនៅសេសសល់ ដែលលាក់ខ្លួនក្នុងភូមិ។ កាំភ្លើង ឧទ្ធម្ភាគចក្រ MG520 ចំនួន ២ គ្រឿងផ្តល់ការគាំទ្រអាកាសដល់កងកម្លាំងជើងគោក។
ក្រុម Abu Sayyaf ដែលជាក្រុមភេរវករឃោរឃៅមានសមាជិកចំនួន២០០នាក់បានធ្វើការបំផ្ទុះគ្រាប់បែកសម្លាប់មនុស្ស និងចាប់ខ្លួនមនុស្សជាបន្តបន្ទាប់នៅខេត្តដាច់ស្រយាល និងខេត្តក្រីក្រនៅភាគខាងត្បូងប្រទេសហ្វីលីពីនគឺរដ្ឋធានី Sulu និងខេត្ត Basilan ។ យោធាម្នាក់និយាយថាចាប់តាំងពីឆ្នាំ២០០៩មកក្រុមនេះបានធ្វើការវាយប្រហារដោយប្រើគ្រាប់បែកចំនួន៤៧គ្រាប់នៅក្នុងខេត្ត Jolo ខេត្ត Basilan និងខេត្ត Zamboanga ដែលបណ្តាលឱ្យជនស៊ីវិល និងទាហានចំនួន៨៣នាក់ស្លាប់ និងចំនួន៥០៥នាក់រងរបួស។
ការវាយប្រហាររបស់ក្រុម Abu Sayyaf ធ្វើឡើងនៅថ្ងៃទី២៤ ខែសីហា នៅពេលដែលក្រុមនេះបានធ្វើការបំផ្ទុះគ្រាប់បែកអត្តឃាតចំនួន០២លើកនៅខេត្ត Jolo ក្នុងរដ្ឋធានី Sulu ដែលសម្លាប់មនុស្សចំនួន១៥នាក់ ដោយក្នុងនោះមានទាហានចំនួន០៨នាក់ និងបណ្តាលឲ្យមនុស្សចំនួន៧៤នាក់រងរបួស។
នៅថ្ងៃទី២៧ ខែមករា ឆ្នាំ២០១៩ មានការផ្ទុះគ្រាប់បែកចំនួន០២គ្រាប់បណ្តាលឲ្យកក្រើកវិហារនៅខេត្ត Jolo សម្លាប់មនុស្សចំនួន ២៣នាក់ និងបណ្តាលឲ្យមនុស្សចំនួន៩៥នាក់ផ្សេងទៀតរងរបួស។
សូមរំលឹកផងដែរថា ក្រុម Abu Sayyaf បានធ្វើការវាយប្រហារលើទេសចរបរទេស ម្ចាស់អាជីវកម្ម ដែលមិនមែនតែលើមនុស្សដែលមកពីប្រទេសហ្វីលីពីនប៉ុណ្ណោះទេ ប៉ុន្តែពួកគេក៏មកពីប្រទេសឥណ្ឌូនេស៊ី និងម៉ាឡេស៊ីផងដែរ ហើយភេរវករទាំងនោះបានលាក់ខ្លួននៅក្នុងព្រៃប្រទេសហ្វីលីពីន ឬកោះដាច់ស្រយាល។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី០៩ ខែកញ្ញា ឆ្នាំ២០២០