កងកម្លាំងចម្រុះដឹកនាំដោយអារ៉ាប៊ីសាអូឌីតពាក់ព័ន្ធនឹងសង្គ្រាមនៅក្នុងប្រទេសយេម៉ែននិយាយនៅថ្ងៃព្រហស្បតិ៍ម្សិលមិញនេះថា ពួកគេបានស្ទាក់ចាប់គ្រាប់មីស៊ីល និងយន្តហោះគ្មានមនុស្សបើក និងគ្រាប់បែកជាច្រើនគ្រាប់ ដែលក្រុមឧទ្ទាម Houthi ទម្លាក់។
នៅក្នុងសេចក្តីថ្លែងការណ៍មួយធ្វើឡើងដោយភ្នាក់ងារសារព័ត៌មានអារ៉ាប៊ីសាអ៊ូឌីត លោក Turki Al Maliki បានឲ្យដឹងថា អ្នកនាំពាក្យក្រុមចម្រុះក៏បានចោទប្រកាន់លើក្រុមជីវពល Houthi ថា បានធ្វើការវាយប្រហារលើជនស៊ីវិល និងទីតាំងរបស់ជនស៊ីវិល។
កងជីវពល Houthis បាន និងកំពុងធ្វើការវាយប្រហារលើទីក្រុងអារ៉ាប៊ីសាអូឌីតដោយប្រើយន្តហោះគ្មានមនុស្សបើកស្ទើរតែរាល់ថ្ងៃដោយភាគច្រើនក្រុមចម្រុះនិយាយថា គ្រាប់ភាគច្រើនត្រូវបានបំផ្លាញ។
គួររំលឹកផងដែរថា សង្គ្រាមស៊ីវិលនៅក្នុងប្រទេសយេម៉ែនបានចាប់ផ្តើមនៅចុងឆ្នាំ២០១៤ មុនពេលក្រុមសម្ព័ន្ធយោធាដឹកនាំដោយអារ៉ាប៊ីសាអូឌីតបានធ្វើអន្តរាគមន៍នៅឆ្នាំ២០១៥ ដើម្បីគាំទ្រប្រធានាធិបតីលោក Abd-Rabbu Mansour Hadi។
ប្រភពព័ត៌មាន Xinhua ចុះផ្សាយថ្ងៃទី១១ ឃែកញ្ញា ឆ្នាំ២០២០
ប្រែសម្រួល៖ ប៉ោក លក្ខិណា
