មន្ត្រីនិយាយនៅថ្ងៃអង្គារ ទី១៥ ខែកញ្ញាថា ក្រុមសកម្មប្រយុទ្ធបាញ់សម្លាប់មនុស្សចំនួន០៣នាក់រួមទាំងសាស្ត្រាចារ្យសាកលវិទ្យាល័យចំនួន០១រូបក្នុងខេត្តចំនួនពីរនៅភាគខាងកើតប្រទេសអាហ្វហ្គានីស្ថាន។
អ្នកនាំពាក្យរដ្ឋាភិបាលក្នុងតំបន់ លោក Ataullah Khogiani មានប្រសាសន៍ថា នៅក្នុងឧប្បត្តិហេតុមួយ ខ្មាន់កាំភ្លើងធ្វើការវាយប្រហារនិងសម្លាប់សាស្ត្រាចារ្យសាកលវិទ្យាល័យមួយរូបនៅក្នុងស្រុក Khogiani ក្នុងខេត្ត Nangarhar។
អ្នកនាំពាក្យបន្តថា សាស្ត្រាចារ្យមហាវិទ្យាល័យអក្សរសាស្ត្រ Literature Faculty at Nangarhar University ត្រូវគេបាញ់សម្លាប់ខណៈពេលដែលគាត់កំពុងធ្វើដំណើរទៅបំពេញភារកិច្ចរបស់គាត់ពីស្រុក Khogiani ។
អ្នកនាំពាក្យរដ្ឋាភិបាលក្នុងតំបន់ប្រាប់ភ្នាក់ងារសារព័ត៌មានថា នៅខេត្ត Logar ជិតគ្នានោះ បងប្រុសចៅសង្កាត់លោក Baraki Barak និងឆ្មាំសន្តិសុខម្នាក់រងការបាញ់សម្លាប់ក្រោយពីខ្មាន់កាំភ្លើងបានលួចចូលក្នុងផ្ទះចៅសង្កាត់ Wais Abdulrahimzai នៅក្នុងស្រុក Mohammad Agha នៃខេត្ត Logar នៅយប់ថ្ងៃចន្ទ។
អ្នកនាំពាក្យបានបន្ថែមថា ក្រុមអ្នកវាយប្រហារបានព្យាយាមសម្លាប់លោកចៅសង្កាត់ ប៉ុន្តែលោកមិននៅក្នុងផ្ទះខណៈពេលមានការវាយប្រហារនោះទេ។
គួរបញ្ជាក់ផងដែរថា ក្រុមសកម្មប្រយុទ្ធតាលីបង់បានធ្វើការវាយប្រហារលើគោលដៅជាច្រើនប្រឆាំងនឹងជនស៊ីវិល និងមន្ត្រីយោធាក្នុងរយៈពេលប៉ុន្មានឆ្នាំថ្មីៗនេះ។ ក្រុមប្រដាប់អាវុធចាត់ទុកបុគ្គលដែលបម្រើការឱ្យរដ្ឋាភិបាល អង្គភាពណាតូ និងកងទ័ពដែលដឹកនាំដោយសហរដ្ឋអាមេរិកជាគោលដៅវាយប្រហាររបស់ពួកគេ។
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី១៥ ខែកញ្ញា ឆ្នាំ២០២០