ប្រព័ន្ធផ្សព្វផ្សាយក្នុងស្រុករាយការណ៍ថា នៅថ្ងៃព្រហស្បតិ៍ ទី២៤ ខែកញ្ញា ប៉ូលិសតួកគីបានឃុំខ្លួនជនជាតិអ៊ីរ៉ាក់យ៉ាងតិចចំនួន០៦នាក់ពីបទជាប់ពាក់ព័ន្ធក្រុមភេរវកម្មរដ្ឋអ៊ីស្លាម (IS) នៅភាគពាយព្យនៃខេត្ត Duzce។
តាមការស៊ើបអង្កេតដែលធ្វើឡើងដោយការិយាល័យរដ្ឋអាជ្ញាសាធារណៈនៅខេត្ត Duzceក្រុមប៉ូលិសបានបើកប្រតិបត្តិការដំណាលគ្នានៅពេលព្រឹកព្រលឹមដើម្បីចាប់ជនសង្ស័យទាំងនោះ។ ប្រភពបន្ថែមថា ជនសង្ស័យត្រូវគេចោទប្រកាន់ថា ជាអ្នកជំនាញគ្រាប់បែក និងជាសមាជិកជាន់ខ្ពស់របស់ IS។
ថ្មីៗនេះ ប្រទេសតួកគីបានបង្កើនប្រតិបត្តិការប្រឆាំងនឹងសមាជិក IS នៅទូទាំងប្រទេស និងបានចាប់មនុស្សជិតចំនួន៤០នាក់ចាប់តាំងពីដើមខែកញ្ញាមក។ នៅថ្ងៃពុធ រដ្ឋមន្ត្រីក្រសួងមហាផ្ទៃតួកគី លោក Suleyman Soylu មានប្រសាសន៍ថា រហូតមកដល់ពេលនេះប្រទេសតួកគីបានរារាំងការវាយប្រហារភេរវកម្មសរុបចំនួន១៥២ករណីនៅក្នុងឆ្នាំនេះ ដោយមានការខិតខំប្រែងពីកងកម្លាំងសន្តិសុខ។
សូមបញ្ជាក់ផងដែរថា ក្រុមឧទ្ទាម IS រងការស្តីបន្ទោសចំពោះការវាយប្រហារប្រល័យនៅក្នុងប្រទេសតួកគីចាប់តាំងពីឆ្នាំ២០១៥ ដោយបានសម្លាប់មនុស្សច្រើនជាង៣០០នាក់។
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៤ ខែកញ្ញា ឆ្នាំ២០២០
