យោធានីហ្សេរីយ៉ានិយាយនៅថ្ងៃព្រហស្បតិ៍នេះថា មេបញ្ជាការជាន់ខ្ពស់មួយចំនួនរបស់ក្រុមជ្រុលនិយមក្នុងខេត្ត Borno ត្រូវគេសម្លាប់ក្នុងកំឡុងពេលប្រតិបត្តិការយោធាថ្មីៗនៅក្នុងខេត្ត Borno។
អ្នកនាំពាក្យការពារជាតិលោក John Enenche មានប្រសាសន៍ថា កងទ័ពជាន់ខ្ពស់នៃជំរុំ Malamfatori បានបើកប្រតិបត្តិការបោសសំអាតទ្រង់ទ្រាយធំនៅជុំវិញតំបន់ Lake Chad Basin បំផ្លាញជំរុំភេរវករ និងកន្លែងលាក់ខ្លួនរបស់ភេរវករជាច្រើនកន្លែងនៅទីតាំងចំនួនប្រាំផ្សេងគ្នានៅតំបន់ Kukawa ក្នុងខេត្ត Borno។
លោកមានប្រសាសន៍ថា យោធាដែលធ្វើការរួមគ្នាជាមួយភ្នាក់ងារសន្តិសុខដទៃទៀតមានការប្តេជ្ញាចិត្តយ៉ាងខ្ពស់ក្នុងការបញ្ចប់កុបកម្ម និងបញ្ហាប្រឈមសន្តិសុខផ្សេងទៀតនៅក្នុងប្រទេស។ លោកជំរុញឱ្យប្រជាជននៅតំបន់ភាគឥសានបន្តសហការជាមួយកងទ័ពដោយ
ផ្តល់មានព័ត៌មាន និងប្រភពគួរឱ្យទុកចិត្ត ដែលនឹងអាចជួយដល់កម្លាំងទ័ពក្នុងការអនុវត្តប្រតិបត្តិការរបស់ពួកគេ។
សកម្មប្រយុទ្ធ Boko Haram បានព្យាយាមបង្កើតរដ្ឋអ៊ីស្លាមមួយនៅភាគឥសាននៃប្រទេសនីហ្សេរីយ៉ាចាប់តាំងពីឆ្នាំ២០០៩ ដោយពង្រីកការវាយប្រហាររបស់ខ្លួនទៅកាន់ បណ្តាប្រទេសនៅតំបន់ Lake Chad Basin ដែលបង្ហាញពីបញ្ហាប្រឈមផ្នែកសន្តិសុខមនុស្សធម៌ និងអភិបាលកិច្ច ដ៏ធំធេងចំពោះប្រទេសនានារួមមានប្រទេសនីហ្សេរីយ៉ា ឆាដកាមេរូន បេណាំង និងនីហ្សេ។
ប្រែសម្រួល៖ ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៤ ខែកញ្ញា ឆ្នាំ២០២០
