ពេទ្យប្រាប់ភ្នាក់ងារព័ត៌មានថា ស្ត្រី និងក្មេងស្រីម្នាក់ស្លាប់នៅថ្ងៃអាទិត្យ ម្សិលមិញនេះ នៅពេលដែលគ្រាប់កាំភ្លើងធំបានវាយប្រហារលើផ្ទះប្រជាជននៅភាគខាងត្បូងទីក្រុងកំពង់ផែសមុទ្រក្រហមរបស់ប្រទេសយេម៉ែន។
ពួកគេនិយាយថា ស្ត្រីចំនួន០៣នាក់ផ្សេងទៀតរងរបួសនៅស្រុក al-Hawak ក្នុងអំឡុងពេលមានការប្រយុទ្ធគ្នាទៅវិញទៅមករវាងកងកម្លាំងរដ្ឋាភិបាល និងក្រុមឧទ្ទាមHouthi ។
នៅក្នុងទីក្រុងកំពង់ផែ Hodeidah មានបទឈប់បាញ់គ្នាដ៏រង្គោះរង្គើរវាងរដ្ឋាភិបាល និងក្រុមឧទ្ទាម Houthi ចាប់តាំងពីភាគីទាំងពីរឈានដល់កិច្ចព្រមព្រៀងបទឈប់បាញ់ ដែលគាំទ្រដោយអង្គការសហប្រជាជាតិនៅទីក្រុង Stockholm នៅខែធ្នូ ឆ្នាំ២០១៨ ។
ទីក្រុងកំពង់ផែស្ថិតនៅក្រោមការគ្រប់គ្រងរបស់ក្រុមឧទ្ទាម Houthi ស្របពេលដែលកងកម្លាំងរដ្ឋាភិបាលបានធ្វើដំណើរឆ្ពោះទៅមុខទៅកាន់ស្រុកភាគខាងត្បូង។
សូមរំលឹកផងដែរថា ប្រទេសយេម៉ែនបានធ្លាក់ចូលទៅក្នុងសង្គ្រាមស៊ីវិលចាប់តាំងពីចុងឆ្នាំ២០១៤ នៅពេលដែលក្រុមឧទ្ទាម Houthi គាំទ្រដោយអ៊ីរ៉ង់បានកាន់កាប់តំបន់ជាច្រើននៅភាគខាងជើងប្រទេស និងបានបង្ខំឱ្យរដ្ឋាភិបាល ដែលមានការទទួលស្គាល់ជាអន្តរជាតិលោកប្រធានាធិបតី Abd-Rabbu Mansour Hadi ចាកចេញពីទីក្រុង Sanaa។
ប្រែសម្រួល៖ប៉ោក លក្ខិណា
ប្រភពព័ត៌មាន Xinhua ចុះផ្សាយថ្ងៃទី២៧ ខែកញ្ញា ឆ្នាំ២០២០